SQO-da tútinge ýlanǵan 4 bala aýrýhanaǵa tústi
PETROPAVL. QazAqparat - Aıyrtaý aýdanynyń ortalyǵy Saýmalkólde bir otbasy ıis tıip ýlanyp qaldy. Qazir tórt bala aýrýhanada jatyr, dep habarlaıdy QazAqparat tilshisi.
Oblystyq TJD baspasóz qyzmetiniń habarlaýynsha, oqys oqıǵa búgin bolǵan. Úı ıesi peshti erte jaýyp tastaǵandyqtan, bir úıli janǵa ıis tıdi. Otbasynyń 4, 7, 10 jáne 12 jastaǵy tórt balasy aýdandyq aýrýhanaǵa jetkizildi. Alaıda olardyń ómirine keler qaýip joq.
Balalardyń 42 jastaǵy anasy men 79 jastaǵy ájesi dárigerdiń tekserisinen keıin úılerine jiberildi.
«6 sáýirde aýdandyq Tótenshe jaǵdaılar bóliminiń qyzmetkerleri úılerdi aralap, turǵyndarmen kezdesti. Olardyń arasynda búgin zardap shekken kelinshek te bar. Bizdiń qyzmetkerler turǵyndarǵa qaýipsizdik erejelerin túsindirip, eskertken bolatyn. Sharada «Iis tııýden ýlaný» jáne «Jylytý maýsymynda órt qaýipsizdigi sharalary» atty jadynamalar taratyldy», - deıdi baspasóz qyzmetiniń mamandary.
