SQO-da turmystyq zorlyq-zombylyqqa qatysty 152 shaǵym kelip túsken

PETROPAVL. QazAqparat – Soltústik Qazaqstan oblysynda 1-4 qazan aralyǵynda turmystyq zorlyq-zombylyqtyń aldyn alýǵa qatysty respýblıkalyq is-shara ótip, 4 kún ishinde otbasynyń shyrqyn buzǵan 152 adam anyqtaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, «Turmys» jedel-profılaktıkalyq is-sharasyna jergilikti polıtsııa qyzmetiniń 500-ge jýyq qyzmetkeri jumyldyryldy. Shara kezinde otbasynyń shyrqyn buzyp, berekesin alatyndardy anyqtaldy.

Polıtseılerdiń aıtýynsha, otbasynda zorlyq-zombylyqtan zardap shekkenderge qaıda habarlasýǵa bolatyndyǵy jóninde, olarǵa qandaı kómek kórsetiletindigi týraly aqparat jazylǵan býkletter ázirlendi. Tirkeýde turǵan shańyraqtar nazarǵa alynyp, olardyń árqaısysymen áńgime júrgizildi.

Nátıjesinde «Turmys» aldyn alý is-sharasy barysynda turǵylyqty mekenjaı boıynsha tirkeýde turǵan 297 otbasy, barlyǵy – 2 421 adam tekserildi. Olardyń 1 400-i maskúnem jáne 184-i nashaqor.

Operatsııanyń 4 kúni ishinde turmystyq zorlyq-zombylyqqa qatysty 152 derek anyqtaldy. Onyń 74-inde zardap shekkender polıtsııanyń kezekshi bólimderine jáne jergilikti polıtsııa ýchaskelerine ózderi habarlassa, 78-in polıtsııa qyzmetkerleri úı-úıdi aralaý barysynda anyqtaǵan.

Jyl basynan SQO aýmaǵynda otbasyndaǵy zorlyq-zombylyqqa qatysty 1491 derek tirkeldi. 127 adam maskúnemdikten májbúrli túrde emdelýge jiberildi.