SQO-da túrmege esirtkini dárethana qaǵazy arqyly kirgizbek bolǵan

PETROPAVL. KAZINFORM - Soltústik Qazaqstan oblysyndaǵy №51 túzeý mekemesine psıhotropty zatty kirgizbek bolǵan adamǵa qatysty qylmystyq is qozǵaldy.

SQO boıynsha qylmystyq-atqarý júıesi departamenti baspasóz qyzmetiniń málimetinshe, mekeme qyzmetkerleri sottalǵandardyń birine kelgen sálemdemeden kúdiktengen. Іshinde qarapaıym zattar - ádettegi dárethana qaǵazy da bolǵan. Qyzmetkerlerdiń qyraǵylyǵynyń arqasynda bul qaǵazdyń belgisiz zatqa shylanǵany anyqtaldy.

- Qaǵaz saraptamaǵa jiberildi. Nátıjesinde onyń quramynda PVP psıhotropty zaty bar ekeni anyqtaldy. Bul – qarapaıym tilmen aıtqanda, sıntetıkalyq psıhostımýlıator. Tárkilengen zattyń salmaǵy – 0,04 gramm, - deıdi SQO boıynsha QAJD bastyǵynyń orynbasary Arman Kasımov.

Mamannyń aıtýynsha, qazir sálemdemeni jibergen adamǵa qatysty Qazaqstan Respýblıkasy Qylmystyq kodeksiniń 297-baby - «Esirtki quraldaryn, psıhotroptyq zattardy, olardyń analogtaryn ótkizý maqsatynda zańsyz satyp alý, saqtaý, tasymaldaý, jóneltý ne ótkizý» boıynsha qylmystyq is qozǵaldy.

- Byltyr túzeý mekemelerine tyıym salynǵan zattardy kirgizýge oqtalýdyń 19 deregi tirkeldi. Onyń ishinde bir ret aqsha, bir ret esirtki, sonsha ret alkogoldi ishimdik kirgizbek boldy. Kóbine uıaly telefon ótkizbek bolady, mundaı 16 derek anyqtalyp, 47 telefon tárkilendi. Ótkizbek bolǵan 10 adamǵa eskertý berildi, 2 adamǵa aıyppul salyndy, - deıdi Arman Kasımov.

Bıyl da sálemdeme arqyly túrmelerge tyıym salynǵan zattardy 11 ret kirgizbek bolǵan. Departamenttiń málimetinshe, 4 jaǵdaıda aqsha, eki ret esirtki jáne 5 ret telefon, roýterlerdi ótkizýge jol berilmedi. Ótkizbek bolǵan 4 adam eskertý aldy.

Buǵan deıin túrmeden shyqqandarǵa qandaı kómek kórsetiletindigin jazǵan edik.