SQO-da túrmedegi kúıeýimen kezdesýge kelgen áıelden tyıym salynǵan zat tabyldy
PETROPAVL. QazAqparat – Soltústik Qazaqstan oblysyndaǵy túzetý mekemeleriniń birine SIM-karta kirgizbek bolǵan áıeldiń isi sotqa jiberildi, dep habarlaıdy QazAqparat tilshisi.
SQO boıynsha qylmystyq atqarý júıesi departamenti baspasóz qyzmetiniń málimetinshe, oqıǵa ES-164/3 mekemesinde bolǵan. Kúıeýimen uzaq ýaqytqa kezdesýge kelgen áıeldi tekserý barysynda odan tyıym salynǵan zat tabyldy. Activ uıaly baılanysynyń SIM-kartasyn sómkesiniń ishki qaltasyna tyǵyp, ishke kirgizbek bolypty.
«Karantındik shekteýlerge baılanysty qylmystyq atqarý júıesi mekemelerinde kópke deıin sottalǵandarǵa týystarymen kezdesýge ruqsat berilmedi. Qazir bul jumystar qaıta jandandy. Alaıda keı sottalǵandardyń týystary bul kezdesýlerdi tyıym salynǵan zattardy túrmege kirgizý úshin qoldanbaq bolyp jatyr. Sómkeden tabylǵan SIM-karta tárkilendi, atalǵan derek boıynsha materıal jınalyp, áıeldi ákimshilik jaýapkershilikke tartý úshin is sotqa jiberildi», - deıdi SQO boıynsha QAJD bastyǵy Rýstan Ahmetjanov.
Ákimshilik jaýapkershilikke tartylǵan adamdar sottalǵan týystarymen bir jylǵa deıin kezdese almaıdy.
