SQO-da túrmedegi 240 adam raqymshylyqqa ilikti

PETROPAVL. QazAqparat – Soltústik Qazaqstan oblysynda el Táýelsizdiginiń 30 jyldyǵyna oraı 240 adam raqymshylyqqa ilikti, dep habarlaıdy QazAqparat tilshisi.

SQO boıynsha Qylmystyq-atqarý júıesi departamenti baspasóz qyzmetiniń málimetinshe, 7 jeltoqsanda QR Prezıdenti «QR Táýelsizdiginiń 30 jyldyǵyna baılanysty raqymshylyq jasaý týraly» Zańǵa qol qoıdy. Raqymshylyq birinshi kezekte 50-ge tolǵan jáne asqan áıelderge, 60 jasqa tolǵan jáne asqan er adamdarǵa, І jáne ІІ toptaǵy múgedekterge, ata-ana quqyǵynan aıyrylmaǵan, asyraýynda 18 jasqa deıingi balalary bar nemese jasyna qaramastan asyraýynda múgedek balalary barlar, Ekinshi dúnıejúzilik soǵys ardagerleri jáne soǵan teńestirilgen tulǵalar ilikti.

«Osy sanattarǵa jatatyn adamdardy anyqtaý úshin oblystaǵy barlyq jazasyn óteýshiler arasynda saýalnama júrgizildi. Onyń nátıjesi sottalýshynyń áleýmettik mártebesin rastaý úshin memlekettik organdarǵa jiberildi. Al asyraýynda balalary bar, biraq ata-ana quqyǵynan aıyrylmaǵan jazasyn óteýshi áıelder boıynsha málimet bilim bólimderinen suratyldy», - deıdi SQO boıynsha QAJD bastyǵy Rýstan Ahmetjanov.

Raqymshylyqqa aýyr, asa aýyr qylmys jasaǵandar, sonyń ishinde terrorızm-ekstremızmge, jeke adamdarǵa qatysty qylmys jasaǵandar, kámelet jasyna tolmaǵandarǵa jynystyq zorlyqqa barǵandar ilikpeıdi.

Qazirgi ýaqytta SQO-nyń túzetý mekemelerinde 1200-den astam sottalǵan bar. Olardyń 240-ǵy zańǵa sáıkes amnıstııamen merziminen erte bosap shyqpaq. Jazasyn óteýshiler kolonııalardan sot qaýlysymen bosatylady. Raqymshylyq merzimi 6 aıǵa sozylmaq.

Elimizde QR Táýelsizdiginiń 25 jyldyǵyna oraı 2016 jyly raqymshylyq jasalyp, sol jyly SQO-da 171 jazasyn óteýshi amnıstııaǵa ilikken edi.