SQO-da túrmede tiginshilikti meńgergen áıel bostandyqta óz isin ashty

PETROPAVL. KAZINFORM – Soltústik Qazaqstan oblysyndaǵy túzeý mekemelerinde jańa oqý jylynda 240 jazasyn óteýshi jańa mamandyqty meńgerip shyqpaq.

SQO boıynsha qylmystyq-atqarý júıesi departamenti baspasóz qyzmetiniń málimetinshe, Petropavldaǵy №50 mekemede jazasyn óteýshilerdiń biri ýaqytty bosqa ótkizbeı, «tiginshi» mamandyǵy boıynsha oqydy. Sabaqqa jaýapkershilikpen qarap, kásiptiń qyr-syryn barynsha meńgerýge tyrysty. Keıin mekeme aýmaǵynda tiginshi bolyp eńbek etti.

Bostandyqqa shyqqannan keıin ol aldymen atelege jumysqa ornalasyp, mamandyǵy boıynsha bilimin shyńdady, tájirıbe jınaqtady. Al ýaqyt óte óz kásibin ashýǵa bel býdy. Búginde onyń senimdi óz komandasy bar, olar tapsyrys boıynsha kıim tigýmen aınalysady.

Qazirgi tańda SQO boıynsha QAJ mekemelerinde 622 sottalǵan eńbekpen qamtylǵan. Olar kolonııalar aýmaǵynda ornalasqan 16 jeke kásipkerlik pen jaýapkershiligi shekteýli seriktestikterde jumys isteıdi.

Jańa oqý jylynda 11 mamandyq boıynsha 240 sottalǵan bilim alady. Eń kóp suranysqa ıe kásipterdiń qatarynda – tiginshi, qurylys mamandyqtary, sondaı-aq ara sharýashylyǵy men landshaftyq dızaın bar.

Buǵan deıin SQO-da áleýmettik jelidegi jazbalary úshin sportshy 6 jylǵa sottalǵanyn jazǵan edik.