SQO-da túrme qyzmetkerlerine jala japqan jazasyn óteýshi taǵy 5 jyl qosyp aldy
PETROPAVL. QazAqparat – Soltústik Qazaqstan oblysy boıynsha qylmystyq-atqarý júıesi departamentiniń túzetý mekemesi qyzmetkerlerine jala japqan jazasyn óteýshi qylmystyq jaýapkershilikke tartyldy. Petropavl soty oǵan taǵy 5 jyl jaza kesti, dep habarlaıdy QazAqparat tilshisi.
SQO boıynsha QAJD baspasóz qyzmetiniń málimetinshe, M esimdi jazasyn óteýshi kisi óltirý, qaraqshylyq, uıymdasqan top, qylmystyq uıym qurý jáne ony basqarý, qorqytyp alýshylyq baptary boıynsha 25 jylǵa sottalǵan. Sonyń 7 jylyn ótegen. Alaıda oblystaǵy ES-164/1 mekemesine – tergeý ızolıatoryna túsisimen-aq ol departament qyzmetkerlerine qatysty jala jaba bastaǵan.
Jazasyn óteýshi mekeme qyzmetkerleri jáne basshylyǵy ózine dene jaraqatyn saldy, adamnyń qadir-qasıetin túsiretin basqa da áreketter jasady jáne aqsha talap etti dep aryzdanǵan. Shaǵymdaryn oblystyq prokýratýraǵa, SQO polıtsııa departamentiniń ózindik qaýipsizdik basqarmasyna, QR Sybaılas jemqorlyqqa qarsy is-qımyl agenttiginiń SQO boıynsha departamentine joldaǵan.
Aryz negizinde mekeme qyzmetkerlerine qylmystyq is qozǵaldy, biraq ol qylmys quramynyń bolmaýyna baılanysty toqtatyldy.
Sottalýshynyń aryzynda jazylǵan faktilerdiń bir de bireýi rastalmady. Beınebaqylaý kameralary men qyzmetkerlerdiń beınejetondarynan alynǵan jazbalar jazasyn óteýshiniń sózin teriske shyǵardy. Sonymen qatar, beınekameralardan alynǵan jazbalardan sottalýshy ózine dene jaraqatyn salǵany belgili boldy.
Sybaılas jemqorlyqqa qarsy qyzmet sottalǵan M-ǵa qatysty QR QK-niń 419-babynyń 3-bóligi «Adamdy sybaılas jemqorlyq, aýyr, asa aýyr qylmys jasady dep aıyptaýmen kórineý jalǵan sóz jetkizý» boıynsha qylmystyq is qozǵady. Petropavl qalalyq soty oǵan 5 jylǵa bas bostandyǵynan aıyrý jazasyn taǵaıyndady.
Endi M jazasynyń ótelmegen bóligine jańa jaza qosylyp, 23 jylyn túzetý mekemesinde ótkizbek.
Aıta keteıik, qazirgi ýaqytta SQO-nyń túzetý mekemelerinde 1400-den astam sottalǵan jazasyn ótep jatyr.
