SQO-da týrızm nysandaryna baratyn joldardy jóndeýge 3,2 mlrd teńge jumsaldy
PETROPAVL. QazAqparat - Soltústik Qazaqstan oblysynyń ákimi Qumar Aqsaqalovtyń aıtýynsha, óńirde Prezıdenttiń tapsyrmasy boıynsha Imantaý-Shalqar kýrort aımaǵyn damytýǵa arnalǵan keshendi jospar ázirlenýde. Halyqaralyq konsaltıng kompanııasy da kýrort aımaǵyn jan-jaqty damytýǵa baǵyttalǵan arnaıy jospar daıyndap jatyr, dep habarlaıdy QazAqparat.
Bıylǵy Joldaýynda Elbasy Nursultan Nazarbaev ishki jáne syrtqy týrızmdy damytýǵa basa kóńil bóldi. Memleket basshysy Soltústik Qazaqstan oblysy Aıyrtaý aýdanyndaǵy Shalqar kóliniń ádemiligi men baı áleýetin atap ótti.
«Elimizdiń turǵyndary Shalqar jáne Imantaý syndy oblysymyzdyń kórikti jerlerimen tanysa alady. Bul kýrorttyq aımaq oblys turǵyndary arasynda ǵana emes, reseılik týrıster arasynda da jaqsy tanys. Tek bıylǵy jyldyń alǵashqy jartyjyldyǵynda týrısterdiń sany eki esege ulǵaıdy», - dedi Qumar Aqsaqalov «Habar» telearnasyndaǵy «Online» tok-shoý baǵdarlamasynda.
Shaǵyn jáne orta bıznes ókilderine týrızm nysandaryn salý úshin memlekettik kómek kórsetilýde. Jergilikti atqarýshy bılik týrızm nysandaryna aparatyn joldardy jóndeýge byltyr 1 mlrd teńge bólse, bıyl 3,2 mlrd teńge baǵyttaldy. 150 kılometr jol jóndelip, týrısterdiń jolǵa jumsaıtyn ýaqyty biraz qysqardy.
Oblys ákimi óńirde ekotýrızmdy damytýǵa da kóp kóńil bólinetindigin atap ótti. Soltústik Qazaqstan - taza ekologııalyq ónim shyǵaratyn óńir, tıisinshe teriskeıdiń ekologııasy taza. Oblysta 2 myńnan asa kól, 700 myń gektardan asa orman bar.
Aqerke Qabykeeva
