SQO-da turǵyndarǵa ormanǵa barýǵa tyıym salatyn qaýly aptanyń sońynda kúshine enedi
PETROPAVL. QazAqparat – Soltústik Qazaqstan oblysynda turǵyndarǵa ormanǵa barýǵa tyıym salynbaq. Qaýly 22 mamyr kúshine enedi, dep habarlaıdy QazAqparat tilshisi.
SQO tabıǵı resýrstar jáne tabıǵat paıdalanýdy retteý basqarmasynyń bólim jetekshisi Aınar Mahmetovanyń aıtýynsha, jańa qaýlyny qabyldaýdaǵy maqsat – eń aldymen turǵyndardyń qaýipsizdigin qamtamasyz etý.
«Orman órti saldarynan kórshi óńirlerde birneshe ret adam ólimi tirkeldi. Osyǵan baılanysty basqarma qaýlyny ázirlep, oblys ákimi oǵan qol qoıdy. Bul qaýly jeke tulǵalarǵa qatysty, olarǵa órt qaýpi joǵary maýsymda memlekettik orman qory aýmaǵyna barýǵa tyıym salynady. Shyrpyny sóndirmeı tastaýdyń saldarynan qanshama alqap órtenýi múmkin. Al orman qalypqa kelýi úshin 50 jyl kerek», - deıdi Aınar Mahmetova.
Qujat 22 mamyr kúshine enedi. Qaýlynyń oryndalýyn mobıldi toptar qadaǵalaıdy. Quramynda tártip saqshylary, tótenshe jaǵdaı qyzmetiniń mamandary jáne ormanshylar bolady.
«Órtke qaýipti maýsymda ormanǵa barǵandarǵa 50 AEK-ke deıin aıyppul salynýy múmkin. Árıne aýa raıynyń jaǵdaıy esepke alynady, kún ystyq bolsa, jel tursa mobıldi toptar reıdke shyǵyp, zańsyz júrgenderdi anyqtaıdy», - deıdi bólim jetekshisi.
Jalpy óńirde jyl basynan 12 orman órti tirkeldi. Orman órtiniń shyǵýy boıynsha, SQO respýblıkada 7 orynda tur. Eń kóp órt Almaty, Shyǵys Qazaqstan jáne Pavlodar oblystarynyń ormandarynda tirkelgen.
