SQO-da turǵyndardyń ortasha aılyq shyǵyny shamamen 24 paıyzǵa ósti
PETROPAVL. QazAqparat – Soltústik Qazaqstan oblysynda turǵyndardyń kúndelikti shyǵyny artqan. Qazir bir adam aıyna 76 myń teńge jumsaıtyn bolǵan, bul byltyrǵydan 23,6 paıyzǵa artyq, dep habarlaıdy QazAqparat tilshisi.
Ulttyq statıstıka bıýrosynyń SQO departamentiniń málimetinshe, úı sharýashylyqtaryn zertteý derekterine sáıkes bıylǵy ІІ toqsanda ortasha jan basyna shaqqandaǵy halyqtyń aı saıynǵy aqshalaı shyǵysy 76,3 myń teńgege jetken. Bul ótken jyldan 23,6 %-ǵa artyq.
«Bul aqshanyń eń úlken úlesi – 89,9 %-y tutyný shyǵysy. Onyń jartysynan astamy azyq-túlikke jumsalady. Al 27,9 %-y azyq-túlik emes taýarlaryn satyp alýǵa, 13,9 %-y aqyly qyzmetterge ketedi. Materıaldyq kómekke, alımentke, nesıe men qaryzdy óteýge, salyqqa 10,1 % jumsalady», - delingen habarlamada.
Azyq-túlikke jumsalatyn qarajattyń úlken bóligi – 26,9 %-y et jáne et ónimderin, 17 %-y jarma ónimderin alýǵa jumsalady. Al azyq-túlik emes taýarlar tobynda 21 %-yn kıim men aıaq kıim alǵan. Qalalyqtar bul maqsatqa 5 %-ǵa artyq qarajat jumsaıdy.
Aqyly qyzmetter shyǵystarynda qarajattyń 35,1 %-y turǵyn úı-kommýnaldyq qyzmetter aqysyna, turǵyn úıdi kútip ustaý men jóndeýge, 30,7 %-y kólik jáne baılanys qyzmetterine, 7,6 %-y bilim berýge jumsalady. Qalalyqtardyń aqyly qyzmetterge jumsaǵan aqshalary aýyldyqtardyń shyǵysynan 1,7 ese asyp túsken.
