SQO-da turǵyndar kóbine bıliktegilerdiń sheshimine jáne áreket etpeýine shaǵymdanady

PETROPAVL. QazAqparat – Soltústik Qazaqstan oblysynda jarty jylda 30 myńnan astam ótinish tússe, basym bóligi jergilikti atqarýshy organdarǵa baǵyttalǵan. Al ishindegi shaǵymnyń úlesi - 3,4 %, dep habarlaıdy QazAqparat tilshisi.

SQO óńirlik kommýnıkatsııalar qyzmetinde quqyqtyq statıstıka organdarynyń jartyjyldyq jumysy qorytyndylandy.

QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń SQO boıynsha departament bóliminiń bastyǵy Aıdar Muqanovtyń aıtýynsha, oblystyń 600-den astam memlekettik organyna jeke jáne zańdy tulǵalardan jyl basynan beri 30 267 myńnan astam ótinish kelip tústi, bul byltyrǵy kórsetkishpen shamalas. Eń kóbi - 63,5% jergilikti atqarýshy organdarǵa kelip tústi.

Shaǵymdar sany 1 036 nemese ótinishterdiń jalpy sanynyń 3,4% qurady.

«Shaǵymdarǵa keletin bolsaq, olardyń deni memlekettik bılik organdary men laýazymdy tulǵalardyń sheshimderi men áreketterine nemese áreketsizdigine, halyqty jumyspen qamtý, áleýmettik jáne zeınetaqymen qamsyzdandyrý, densaýlyq saqtaý, sanıtarııa men gıgıena boıynsha jáne memlekettik basqarýdyń, turǵyn úı-kommýnaldyq sharýashylyqtyń, bilim berýdiń jalpy máseleleri. Ótken jylmen salystyrǵanda shaǵym sany 21,5% tómendegen», - deıdi Aıdar Muqanov.

Qaralǵan ótinishterdiń 10 myńǵa jýyǵy boıynsha oń sheshim shyqty. 12 myńy boıynsha túsindirý jumysy júrgizilse, myńǵa jýyǵy boıynsha ákimshilik akt qabyldanǵan.