SQO-da turǵyndar 16 pýnktte koronavırýs vaktsınasyn alady
PETROPAVL. QazAqparat – Soltústik Qazaqstan oblysynda turǵyndarǵa koronavırýsqa qarsy vaktsına salyna bastady. Óńir halqy vaktsınany 16 ekpe pýnktinde tegin ala alady, dep habarlaıdy QazAqparat tilshisi.
Ekpe pýnkti Petropavldaǵy № 1 qalalyq emhanada da ornalasqan. Aqpan aıynan beri bul jerde 900-ge jýyq adamǵa vaktsına egilgen. Olar negizinen medıtsına, polıtsııa qyzmetkerleri men muǵalimder. Endi turǵyndar da kelip, qarsy kórsetilim bolmaǵan jaǵdaıda ekpe saldyrýyna bolady.
«Vaktsına egilý arqyly siz koronavırýstan tolyq qorǵalasyz deý durys emes. Oǵan eshkim kepildik bermeıdi. Biraq ekpe alǵannan keıin vırýs juqtyratyn bolsańyz, aýrý jeńil ótedi. Asqynbaıdy. Sol sebepti turǵyndardy koronavırýsqa qarsy ekpe alýǵa shaqyramyn. Ekpe barlyǵyna tegin egiledi», - deıdi Petropavl qalalyq № 1 emhananyń jalpy tájirıbe dárigeri Lıdııa Sokolova.
SQO-da Petropavl turǵyndary ekpeni qalalyq tórt emhanada, al aýyldyqtar aýdandyq ortalyq aýrýhanalarda alady. Tek Jambyl aýdanynda ekpe egý pýnktiniń sany – ekeý.
SQO densaýlyq saqtaý basqarmasynyń málimetinshe, turǵyndarǵa vaktsına sáýirden bastap egile bastady. Jalpy SQO-da 6 391 adam egildi, onyń ishinde 2 122 adam vaktsınatsııadan tolyq ótti.
