SQO-da turǵyn úıden órt shyǵyp, bir jasar sábı mert boldy
PETROPAVL. QazAqparat – Soltústik Qazaqstan oblysy Beskól eldi mekeninde turǵyn úıden órt shyǵyp, 1 jas 7 aılyq sábı mert boldy, dep habarlaıdy QazAqparat tilshisi.
Oqys oqıǵa búgin Qyzyljar aýdanyndaǵy Beskól eldi mekeninde bolǵan. Órt sóndirý qyzmetine Lesnaıa, 9 kóshesindegi eki páterli baspananyń janyp jatqany jóninde habar saǵat 10.43-te túsken. Mamandar jetkenshe úı otqa oranyp úlgeripti. Órt sóndirýshiler janyp jatqan baspanadan sábıdi alyp shyqty. Bala birden dárigerlerdiń qolyna tabystalǵanmen, aman alyp qalý múmkin bolmady. Iis tıgen sábı aýdandyq ortalyq aýrýhanada kóz jumdy.
Órt sóndirý qyzmeti mamandarynyń sózine qaraǵanda, órttiń shyǵýyna durys sónbegen shelektegi kúl sebep bolǵan.
«Turǵyn úıde úsh eresek adam jáne úsh bala turǵan. Balalardyń bireýin mektepten qarsy alý úshin anasy shyǵyp ketken. Órt bastalǵan kezde úıde 78 jastaǵy áıel jáne 2011 jáne 2018 jyly týǵan eki bala bolǵan. Ájesi úlken nemeresin úıden shyǵaryp úlgeripti. Al ekinshisin belgisiz sebeptermen qutqara almaǵan. Jasy úlken, múmkin ne isterin bilmeı eseńgirep qalǵan shyǵar. Kúl toly shelekti de osy kisi dalaǵa shyǵarýdy umytyp ketken», - deıdi SQO tótenshe jaǵdaılar departamenti «Órt sóndirý jáne apattyq-qutqarý jumystary qyzmeti» MM bastyǵy Nurlan Kólbaev.
SQO tótenshe jaǵdaılar departamenti baspasóz qyzmetiniń habarlaýynsha, qyzyl jalynmen kúreske 5 tehnıka men 40 maman jumyldyryldy. Órt saǵat 12.00 shamasynda tolyqtaı sóndirildi. Ekinshi páterge zaqym kelgen joq.
Jalpy SQO-da jyl basynan beri órtten 41 adam mert bolsa, sonyń ekeýi – bala.
