SQO-da turǵyn úı órtenip, 4 adam qaza boldy
PETROPAVL. QazAqparat – Soltústik Qazaqstan oblysy Býlaev qalasynda turǵyn úı órtenip, 3 eresek adam men 4 jasar bala mert boldy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, búgin tańǵy saǵat 7.00 shamasynda 112 qyzmetine M.Jumabaev aýdany Býlaev qalasyndaǵy Stepnaıa, 31 mekenjaıy boıynsha turǵyn úıdiń janyp jatqandyǵy jóninde habar túsedi. Kórshileriniń aıtýynsha, baspanada bir otbasy turǵan.
Oqıǵa ornyna órt sóndirýshiler jetken kezde úıdiń shatyry jalynǵa oranyp úlgeripti. Kóp uzamaı baspanadaǵy gaz ballony jarylyp, úıdiń tóbesi opyrylyp tústi.
Órtti sóndirý barysynda órt sóndirýshiler úıden 4 adamnyń denesin alyp shyqty, olar: 1993 jyly týǵan úı ıesi er adam, onyń 1992 jyly týǵan áıeli, olardyń 2017 jyly týǵan uly jáne áıel adam. Búginde ol áıeldiń kim ekendigi anyqtalyp jatyr.
«Órt tolyqtaı saǵat 14.00 shamasynda sóndirildi. Úı tutas janyp ketti.
Qazir kelgen shyǵyn mólsheri jáne órttiń neden shyqqany anyqtalyp jatyr.
Qaza tapqandardyń týystarymen psıhologtar jumys isteýde», - dedi SQO tótenshe jaǵdaılar departamenti basqarmasynyń bastyǵy Dmıtrıı Rastıhın.
Jalpy jyl basynan SQO-da 96 órt bolyp, 15 adam qaza tapty, 9 adam jaraqat aldy. Kelgen materıaldyq shyǵyn 27 mln teńgeden artyq.
Dmıtrıı Rastıhınniń aıtýynsha, órtterdiń 78 %-y jeke sektorǵa tıesili. Qaza tapqandardyń barlyǵy osy jer úılerdiń turǵyndary.
