SQO-da turǵyn úı kezegindegi 1,4 myńǵa jýyq jetim bala tizimnen zańsyz shyǵyp qalǵan

PETROPAVL. QazAqparat – Soltústik Qazaqstan oblysynda sybaılas jemqorlyqqa qarsy qyzmet jarty jyldyqty qorytyndylady. Jumys nátıjesinde óńir turǵyndary arasynda ózekti birqatar áleýmettik másele sheshimin tapty, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttigi SQO boıynsha departamentiniń basshysy Sergeı Perov jarty jyldyqta atqarylǵan jumys jóninde óńirlik kommýnıkatsııalar qyzmetiniń alańynda esep berdi. Departamenttiń mindeti – oblys turǵyndarynyń ómir súrý sapasyn jaqsartý.

«Departamenttiń keshendi sharalarynan keıin óńirde buǵan deıin baqylaýy qıyn, saldarynan sybaılas jemqorlyq táýekeli joǵary – joldarǵa qıyrshyq tas tóseý ádisi qoldanylmaıtyn boldy. Bıyl Petropavl qalalyq turǵyn úı-kommýnaldyq sharýashylyǵy bólimi asfalt tóseýge basymdyq berdi. Nátıjesinde oblys ortalyǵynyń 30 kóshesiniń jolyn jóndeýge bıýdjetten 6 mlrd teńge bólindi. Departamenttiń bastamasymen monıtorıng toby quryldy, qoǵam ókilderi jumystyń sapaly atqarylýyn baqylaýǵa alǵan», - deıdi Sergeı Perov.

Atqarylǵan jumystardyń biri – turǵyn úıdi berýde azamattardyń quqyǵyn qorǵaýǵa qatysty.

«Bizdiń usynymdarymyz eskerile otyra memlekettik qordan turǵyn úı zańdy túrde bóline bastady. Qazirdiń ózinde 5 páter zańdy ıelerine berildi.

Memlekettik turǵyn úı qoryn túgendeý jumystary jalǵasyp jatyr.

Máselen, Aıyrtaý aýdany ákimdigine zańsyz berilgen 5 páterdi alyp qoıý boıynsha sot protsesi bastaldy. Mundaı jumys oblystyń barlyq aýdandarynda júrgiziledi.

Áleýmettik osal topqa jatatyn azamattardyń jáne jetim balalardyń kezegin qalpyna keltirip, olarǵa páter berý protsesi bastaldy. Máselen turǵyn úı alýǵa kezekte turyp, keıin tizimnen shyǵyp qalǵan 1 367 jetim balanyń quqyǵy qorǵaldy», - deıdi Sergeı Perov.