SQO-da turǵyn úı qazandyǵy jaryldy
PETROPAVL. QazAqparat - SQO Aqqaıyń aýdanynyń ortalyǵy Smırnovo eldimekeninde turǵyn úıdiń qazandyǵy jaryldy, dep habarlaıdy QazAqparat tilshisi.
SQO Tótenshe jaǵdaı departamenti baspasóz qyzmetiniń málimetinshe, oqıǵa naýryzdyń 16 kúni kúndizgi on birler shamasynda bolǵan. «Novostroıka» turǵyn úı kooperatıvine qaraıtyn Sývorov kóshesi, 73 mekenjaıyndaǵy 2 qabatty 18 páterlik eki úıdiń bólek turǵan qazandyǵy jarylǵan. Saldarynan ǵımarattyń shatyry men qabyrǵalaryna zaqym keldi. Qaza tapqandar men zardap shekkender joq.
Mamandardyń aıtýynsha, otyn-kómirmen jylytylatyn qazandyqtyń, aldyn ala boljam boıynsha, salqyndatqysh suıyqtyǵy qyzyp ketýi múmkin.
Oqıǵa ornynda tótenshe jaǵdaı boıynsha aýdandyq bólimniń mamandary men jergilikti atqarýshy organdardyń qyzmetkerlerinen quralǵan top jumys istedi. Al 3,5 saǵattan keıin jylytý júıesi qalpyna keltirildi.
