SQO-da turǵyndardyń 90 myńǵa jýyǵy saqtandyrylmaǵan

PETROPAVL. KAZINFORM – Soltústik Qazaqstan oblysynda turǵyndardyń 83% ǵana «saqtandyrylyp», mindetti áleýmettik medıtsınalyq aýdarymdar tólep keledi.

«Áleýmettik medıtsınalyq saqtandyrý qory» KEAQ SQO boıynsha fılıal dırektorynyń orynbasary Talǵatbek Tileýberdınniń aıtýynsha, bıyldan bastap mindetti áleýmettik medıtsınalyq saqtandyrý júıesi aıasynda turǵyndardyń barlyǵyna qant dıabeti, glaýkoma, gepatıt aýrýlaryn anyqtaý maqsatynda aldyn ala skrınıngter júrgizilmek. Buǵan qosa, onkologııalyq aýrýlardy anyqtaý úshin profılaktıkalyq tekserister artyp, barlyq sanattaǵy naýqastar tekserýden ótedi.

— Bıyl jatyr moıny obyryna tekserý maqsatynda 30, 34, 38, 42, 46, 50, 54, 58, 62, 66,70 jastaǵy áıelderdiń 90% onkoskrınıngpen qamtylmaq. Sondaı-aq sút bezi obyryn anyqtaý úshin óńirde turatyn qyz-kelinshekterdiń 80% tekseristen ótýi shart. 40 pen 70-ke deıingi jas aralyǵy skrınıgten ótedi. Erlerdi de onkologııalyq aýrýlarǵa tekseristen ótkizýdi josparladyq, — deıdi Talǵatbek Tileýberdın.

Mamannyń aıtýynsha, bıyl kepildendirilgen medıtsınalyq kómek paketi aıasynda dıspanserlik esepte turǵandardy emdeýge basymdyq berilmek. Búginderi Petropavlda ǵana 88 myńnan astam turǵyn tirkeýde tur.

— Medıtsınalyq ońaltýǵa keler bolsaq, óńirde statsıonarlyq jáne ambýlatorlyq deńgeılerde eresekter men balalarǵa birneshe emdeý mekemesi medıtsınalyq qyzmet túrlerin kórsetedi. Eresekterge táýliktik statsıonar oblystyń 7 densaýlyq saqtaý uıymynda jáne balalarǵa 3 emdeý ornynda qarastyrylǵan. Ambýlatorlyq turǵyda 18 jastan asqandarǵa 10 mekeme qyzmet kórsetedi. Olardyń qatarynda memlekettik uıymdarmen qatar, jeke klınıkalar da bar. Al balalarǵa 7 medıtsınalyq mekeme óz qyzmetterin usynady, — deıdi fılıal basshysynyń orynbasary.

Jalpy mindetti áleýmettik medıtsınalyq aýdarymdardy tólegen azamattarǵa medıtsınalyq qyzmetterdiń kóptegen túri qoljetimdi. Olar: emdelý, dıagnostıka, medıtsınalyq-sanıtarlyq alǵashqy kómek dárigerleriniń joldamasy boıynsha kásibı biliktiligi joǵary mamandarǵa kóriný. Zerthanalyq aspaptyq ádister arqyly dıagnostıka jáne emdeýdiń joǵary tehnologııalyq ádisterin paıdalaný, onyń ishinde MÁMS aıasynda statsıonarda dárilik preparattarmen tegin qamtylý arqyly emdelý jáne medıtsınalyq ońaltý sharasy da bar.

Fılıaldyń málimetinshe, qazir óńirde 532 myń turǵyn bolsa, sonyń 83,2% nemese 442 654 adam saqtandyrylǵan, qalǵan 90 myńǵa jýyǵy saqtandyrylmaǵan eken.

Buǵan deıin SQO-da 84 adam shoshqa tumaýyn, tórt adam gonkong tumaýyn juqtyrǵanyn jazǵan edik.