SQO-da turǵyndar tumaýǵa jatpaıtyn vırýstarmen aýyryp jatyr

PETROPAVL. KAZINFORM – Soltústik Qazaqstan oblysynda bir aptada jiti respıratorlyq vırýstyq ınfektsııa juqtyrǵandar sany 1,5 ese ósti. Tumaýmen aýyrý deregi tirkelmegenimen, PTR-dıagnostıka kezinde syrqattanǵandardan vırýstyń basqa túrleri anyqtaldy.

SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, tumaýǵa jatpaıtyn bul vırýstardyń - paragrıpptiń 8 jaǵdaıy, rınovırýstyń 12 jaǵdaıy, adenovırýstyń 7 jaǵdaıy, metapnevmovırýstyń 2 jaǵdaıy, bokavırýstyń 3 jaǵdaıy anyqtalǵan.

Búgingi tańda SQO-da jiti respıratorly vırýsty ınfektsııa boıynsha ósim bar.

Jańa epıdemııalyq maýsym bastalǵaly óńirde 15 myńǵa jýyq adam JRVI juqtyrǵan, desek te bul ótken jyldyń sáıkes kezeńimen salystyrǵanda 14% tómen. Naýqastardyń basym bóligi, 66% - 14 jasqa deıingi balalar.

«Sońǵy aptada JRVI-diń 2773 jaǵdaıy tirkeldi, ótken aptamen salystyrǵanda 1,5 ese ósim bar. Maýsymdyq tumaýmen kúresýdiń bir joly – vaktsınatsııa. Táýekel tobyna jatatyn adamdar úshin reseılik «Grıppol plıýs» vaktsınasynyń 60 myń dozasy satyp alyndy. Jospar 100% oryndaldy. Tumaýǵa qarsy vaktsınatsııadan basqa, spetsıfıkalyq emes profılaktıkany nazardan tys qaldyrmaý kerek: aýyryp qalmaý úshin betperdeni durys kııý, áleýmettik qashyqtyqty saqtaý, múmkindiginshe adamdar kóp jınalatyn jerlerge barmaý, jeke gıgıena erejelerin saqtaý qajet», - deıdi Áset Jumataev.

Buǵan deıin Petropavlda ótken táýlikte jaraqat alǵan 120 adam dáriger kómegine júgingenin jazǵan edik.