SQO-da turǵyndar kómirdi satyp alýǵa asyǵar emes
PETROPAVL. KAZINFORM — Soltústik Qazaqstan oblysynda halyq josparlanǵan 390 myń tonnanyń 187 myń tonnasyn nemese 48% ǵana daıyndaǵan.
Oblystyq ákimdikte ótken jıynda aldaǵy jylytý maýsymyna daıyndyq máselesi qaraldy. Bıyl aldaǵy jylytý maýsymyna daıyndyqqa barlyq qarjylandyrý kózderinen 70 mlrd teńge qarastyrylǵan.
SQO energetıka jáne turǵyn úı-kommýnaldyq sharýashylyǵy basqarmasynyń basshysy Álisher Bespaevtyń aıtýynsha, qazir óńirdegi qazandyqtardyń 98%, bilim berý nysandarynyń 99% jáne densaýlyq saqtaý obektileriniń 98% daıyn. Al kópqabatty úılerdiń tek 90% ǵana daıyn.
Oblysta jylytý maýsymyna barlyq daıyndyq jumystary 15 qyrkúıekke deıin aıaqtalýy tıis.
— Jergilikti atqarýshy organdarǵa kómir tapshylyǵyna baılanysty dúrbeleńge jol bermeý jáne turǵyndarǵa otyndy aldyn ala satyp alýdyń mańyzyn túsindirý tapsyryldy.
Qazir óńirde josparlanǵan 624 myń tonna kómirdiń 342 myń tonnasy, ıaǵnı 55% jınalǵan. Bıýdjettik uıymdarǵa qajetti 154 myń tonnanyń 140 myń tonnasy, ıaǵnı 91% jetkizildi. Halyq 187 myń tonna kómirdi, 48% ǵana satyp alǵan, — deıdi Álisher Bespaev.
Bıyl oblysta qazandyqtar men jylý jelilerin jóndeýge 804 mln teńge qarastyrylǵan. Bul qarjyǵa segiz qazandyq jóndelip, alty jańa qazandyq satyp alynady. Sonymen qatar 1,5 shaqyrym jylý jelisi jóndelip, eki aýdanda jańa qazandyqty iske qosý josparlanǵan.
— Keıbir aýdandarda jumys qarqyny tómen. Máselen, Mamlıýt aýdanynda qazandyqty aýystyrýǵa 27,4 mln teńge bólingenimen, jańa qazandyq tek 15 qyrkúıekten keıin jetkizilmek. M. Jumabaev aýdanyndaǵy Býlaev qalasynyń blokty-modýldik qazandyǵyn jóndeýge nebári birneshe kún buryn ǵana kirisken. Al Shal aqyn aýdanyndaǵy Sergeevkada jańa jabdyqty ornatý jumystary da jospar boıynsha kesh bastalmaq, — deıdi basqarma basshysy.
Buǵan deıin jylý berý maýsymyna daıyndyq bastalǵaly Qazaqstan boıynsha 19 mln tonna kómir tasymaldanǵanyn jazǵan edik.
