SQO-da turǵyndar qandaı veterınarııalyq talaptardy jıi buzady
PETROPAVL. KAZINFORM - Soltústik Qazaqstan oblysynda veterınarııalyq talaptardy buzǵandarǵa bıyl 276 aıyppul salynǵan.
Veterınarııalyq baqylaý jáne qadaǵalaý komıtetiniń SQO aýmaqtyq ınspektsııasynyń málimetinshe, jeti aıda ınspektsııa tarapynan jeke jáne zańdy tulǵalarǵa jalpy somasy 12 mln 490 myń teńge aıyppul salyndy. Sonyń ishinde 188 aıyppul el aýmaǵynda memlekettik veterınarııalyq-sanıtarııalyq baqylaý men qadaǵalaýǵa jatatyn nysandardy tasymaldaý kezinde veterınarııalyq qaǵıdalardy saqtamaǵany úshin rásimdelgen. Olardyń jalpy somasy 9 mln 273 myń teńge boldy. Sonymen qatar, 40 eskertý berilgen.
Byltyr óńirde veterınarııalyq talaptardy buzýdyń 382 deregi anyqtalyp, 14 mln 322 myń teńge aıyppul salǵan.
- Kóbine maldy tasymaldaý nemese ornyn aýystyrý kezinde veterınarııalyq qaǵıdalar saqtalmaıdy. Bul sharalar QR Ákimshilik quqyq buzýshylyq týraly kodeksiniń 406-baby 1-bóliginiń 2-tarmaǵyna sáıkes qabyldanǵan.
Sondaı-aq jergilikti atqarýshy organdardyń veterınarııa salasyndaǵy bólimshelerine jańadan satyp alynǵan janýarlar, alynǵan tól, janýarlardy soıý jáne ótkizý týraly tıisti habarlama usynbaý faktileri de tirkelgen.
Budan bólek epızootııalarǵa qarsy kúres máseleleri boıynsha normatıvtik quqyqtyq aktilerdi, sondaı-aq veterınarııa salasyndaǵy ózge de normatıvtik quqyqtyq aktilerdi buzǵany úshin bıyl jalpy somasy 595 myń teńge shamasynda 17 aıyppul salyndy, - deıdi ınspektsııa basshysy Erbatyr Madıarov.
Inspektsııa málimetine sáıkes, anyqtalǵan buzýshylyqtardyń eshqaısysy epızootııanyń taralýyna nemese ózge de aýyr zardaptarǵa ákep soqpaǵan.
Mal soıý nysandarynda zań buzýshylyqtar anyqtalmaǵan.
Buǵan deıin BQO-da veterınarııalyq talaptyń buzylýyna baılanysty 18,4 tonna ónim keri qaıtarylǵanyn jazǵan edik.
