SQO-da turǵyndar bıyl sańyraýqulaqtan mol ónim alyp jatyr
PETROPAVL. KAZINFORM – Soltústik Qazaqstan oblysynda kúz - sańyraýqulaq terýge eń qolaıly shaq. Bıyl qolaıly aýa raıynan orman syıy – sańyraýqulaq molynan shyqqan.
Esil aýdany Zagradovka aýylynyń turǵyny Vladımır Pısarenko bir saǵat ishinde úsh shelek sańyraýqulaq terip aldy. Endi úıine aparyp, is qylmaq.
- Bıyl sańyraýqulaq óte kóp. Biraq men tamyz aıynyń basynda jumystan bosaı almaı birinshi tolqynyn ótkizip aldym. 23 tamyzdan bastap ekinshi tolqyny bastaldy. Qazir naǵyz sańyraýqulaq teretin shaq. Kún salqyn, tez shirip ketpeı, jaqsy saqtalǵan. Qysty kúni tuzdalǵan sańyraýqulaqty dastarhanǵa qoısań qandaı keremet! Artylǵanyn satýǵa da bolady, - deıdi Vladımır Pısarenko.
Aýyl turǵyny qoly sál bosasa, shelegin alyp ormanǵa attanady.
Onyń aıtýynsha, biletin sańyraýqulaqty ǵana tergen durys nemese tájirıbesi bar adamǵa ergen jón.
- Sańyraýqulaqty jastaıymnan teremin. Kórshi aýylda Masha degen ájeı turdy. Sol kisiden qandaı sańyraýqulaq jaramdy, ony qaı kezde terý kerek jáne qysqa ázirleý tásilderin úırendim. Búgin tergen aq sańyraýqulaqty tuzdaýǵa da, marınadtaýǵa da bolady. Tuzdalǵan túrin tek sýyq jerde ǵana saqtaý kerek, - deıdi aýyl turǵyny.
Aýyldan birer shaqyrym jerde ornalasqan ormanda sańyraýqulaq tergen adamnyń qarasy qalyń.
- Anamnyń qasynda júrip úırendim. Qazir kóbine joldasym ekeýimiz baramyz sańyraýqulaq terýge. Bul biz úshin eń aldymen demalys. Bul ormanǵa keletinder kóp. Senbi-jeksenbi kólik tolyp ketedi. Biraq munda sańyraýqulaq bárine jetedi, - deıdi Zagradovka aýylynyń turǵyny Tatıana Kakýnına.
Óńirde sańyraýqulaqty qazan aıy boıy terýge bolady.
Buǵan deıin SQO-da sańyraýqulaq terýge shyǵyp, adasqan áıeldiń aýylynan 10 km uzap ketkenin jazǵan edik.
