SQO-da turaqtandyrý qory arqyly 1,2 mln teńgeniń dári-dármegi satyldy
PETROPAVL. QazAqparat – Soltústik Qazaqstan oblysynda 21 túrli-dári-dármek turaqtandyrý qory arqyly arzan baǵaǵa satylyp jatyr, dep habarlaıdy QazAqparat tilshisi.
SQO densaýlyq saqtaý basqarmasynyń málimetinshe, óńir basshysynyń tapsyrmasymen óńirde dári-dármek, medıtsınalyq buıymdar boıynsha turaqtandyrý qory qurylǵan.
Maqsaty – koronavırýs ınfektsııasyna, maýsymdyq aýrýlar – tumaý, sýyq tııýge qarsy medıtsınalyq preparattardyń qoryn quryp, baǵanyń sharyqtap ketpeýine yqpal etý.
Densaýlyq saqtaý basqarmasy tizimge 28 dári-dármekti engizdi. Olardyń ishinde vırýsqa qarsy, antıbakterıaldy, antıgıstamındi preparattar, antıkoagýlıanttar, bronholıtıkter men ystyqty túsiretin dáriler bar. Munyń bári «Soltústik» ÁKK arqyly satyp alynady, osy maqsatqa 357 mln teńge bólingen.
Dári-dármek dárihanalarda, eldimekenderde dárigerlik ambýlatorııalarda, dárigerlik akýsherlik pýnktterde, medıtsınalyq pýnktterde satylady. Turaqtandyrý qorynyń dári-dármegi naryqtaǵy baǵadan 15-20 %-ke arzan.
Mamandardyń aıtýynsha, bir aıdyń ishinde 123 mln teńgege tizimge engen 21 túrli medıtsınalyq preparat satyp alyndy. Baǵasy arzan bolǵandyqtan suranys joǵary. Shamamen úsh aptanyń ishinde 1,2 mln teńgeniń dári-dermegi satylǵan.
