SQO-da tuńǵysh ret kınologtar saıysy ótýde
PETROPAVL. QazAqparat - Soltústik Qazaqstan oblysynda alǵash ret quqyq qorǵaý organdaryndaǵy kınolog mamandardyń chempıonaty ótýde.
Baıqaýdyń negizgi maqsaty - kınologtardyń kásibı sheberlikterin kóterý jáne qyzmettik ıtterdiń daıyndyq deńgeıin anyqtaý, dedi SQO ІІD kınologııalyq qyzmet ortalyǵynyń basshysy, polıtsııa kapıtany Samat Tólebaev.
Qazir ortalyqta ovcharka, labrador, spanıel sekildi qyryqqa jýyq ıt qyzmet etedi. Tórt aıaqty polıtseıler túrli baǵytta jumys isteıdi: ıis arqyly joǵalǵan adamdardy, jarylǵysh zattar men esirtkilerdi izdeý. Olarsyz qylmysty ashý ekitalaı, deıdi kınologtar. Kún saıyn Petropavlda kem degende 7 shaqyrtýǵa barady.
Bul saıysqa barlyq aýdandyq ishki ister bólimderinen, áskerı bólim, shekaralyq qyzmet, SQO MKB, QAJD, ІІJB 22 kınolog qatysady. Barlyǵy 18 komanda. Saıys baǵdarlamasyna 4 baıqaý engizilgen - dressırovkadan jalpy konkýrs, kedergi jolaqtarynan ótý, esirtki zattaryn izdeý, qarýly qylmyskerdi ustaý. Baıqaý 28 qyrkúıekke deıin jalǵasady.
SQO kınologııalyq qyzmet ortalyǵy resmı túrde 2008 jyly ashyldy. 2014 jyldan bastap oblys aýdandarynda kınologtar paıda boldy. Ázirge ár aýdanda bir kınologtan jumys isteıdi.
Jyl basynan beri SQO qyzmettik-izdestirý ıtteriniń qatysýymen 567 qylmys ashyldy, 170 keli esirtki zańsyz aınalymnan shyǵaryldy.
