SQO-da tumaýǵa jatpaıtyn vırýstardyń jeti túri tarap jatyr

PETROPAVL. KAZINFORM — Soltústik Qazaqstan oblysynda bir aptada jiti respıratorlyq vırýsty ınfektsııany juqtyrǵandar sany 22% ósti.

SQO sanıtarııalyq-epıdemıologııalyq baqylaý departamentiniń málimetinshe, epıdemııalyq maýsym bastalǵaly JRVI-men 67 myńǵa jýyq adam aýyrdy. Bul ótken jyldyń sáıkes kezeńimen salystyrǵanda 20% tómen, desek te sońǵy aptada syrqattanǵandar sany artyp, 3,5 myń adam dárigerdiń kómegine júgindi.

Oblysta tumaýǵa jatpaıtyn vırýstar da kóp taralǵan. Máselen rınovırýsty juqtyrýdyń 32 jaǵdaıy, adenovırýstarmen aýyrýdyń — 22, paragrıppti juqtyrýdyń — 12, basqa koronavırýstar — 11, metapnevmovırýstar — 5, respıratorlyq sıntsıtıaldy vırýstardy juqtyrýdyń 5 jaǵdaıy jáne 3 adamda bokavırýstar anyqtalǵan.

Óńirde tumaýdy juqtyrǵandar sany da artyp keledi. Osyndaı 92 jaǵdaı tirkeldi, onyń ishinde A tıpti tumaý nemese «shoshqa» tumaýymen 79 adam, maýsymdyq H1N1 — 4, H3N2 — 3 jáne V tıpti tumaýmen 6 adam syrqattandy. Tumaýmen aýyrǵandardyń 32-si — 14 jasqa deıingi balalar, taǵy 4 jaǵdaı júkti áıelder arasynda tirkeldi. Naýqastar tumaýǵa qarsy ekpe almaǵan eken.

Buǵan deıin SQO-ǵa tasqynmen kúreske alǵashqy kómek kelip jetkenin jazdyq.