SQO-da tumaýǵa qarsy ekpe egý bastaldy
PETROPAVL. QazAqparat – Soltústik Qazaqstan oblysynda tumaýǵa qarsy kúzgi ekpe jumystary úshin 60 myń dana vaktsına satyp alyndy, dep habarlaıdy QazAqparat tilshisi.
SQO taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, oblysta 1 qazannan bastap tumaýǵa qarsy ımmýndaý júrgiziledi. Osy maqsatqa reseılik «Grıppol plıýs» vaktsınasynyń 60 000 dozasy satyp alyndy.
Birinshi kezekte táýekel toptary ekpe alady. Olardyń ishine 9 myńnan astam medıtsınalyq qyzmetker, dıspanserlik esepte turǵan jáne alty aıdan asqan jıi aýyratyn 10 myńnan astam bala, budan basqa balalar úıiniń tárbıelenýshileri, qarttar men múgedekter úıiniń turǵyndary, júkti áıelder tegin ımmýndalady. Tumaý vırýsyna aǵza tótep berýi úshin sozylmaly aýrýlary, júrek-tamyr júıesi aýrýlary jáne tynys alý organdary aýrýlary bar 38 myń adamǵa ekpe egiledi.
«Byltyr tumaýǵa qarsy alynǵan preparat bıylǵy vırýstan qutqarmaıdy. Óıtkeni tumaý vırýsy jyl saıyn ózgerip jatyr. Sondyqtan jyl saıyn tek bıyl shyǵarylǵan vaktsınamen ǵana egilý qajet. Immýnıtet 14 kúnnen keıin qalyptasady jáne bir jyl kúshin saqtaıdy. Egýdi qazan-qarasha aılarynda jasaǵan durys. Bıylǵy maýsymda A/Brisbane (H1N1), a/Kansas (H3N2), B/Colorado jáne B/Phuket tıpti tumaý vırýsynyń 4 shtammy ózekti», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń bas mamany Saltanat Bekqojına.
Tumaý vırýsy juqqan adamnyń dene temperatýrasy 39-40S-qa deıin kóterilip, qatty qaltyraý, jótel, jalpy álsizdik, muryn bitelýi, qatty bas aýrýy, sondaı-aq bulshyq et pen býyndardaǵy aýyrsyný men syrqyrap aýrý bolady.
«Tumaý asqynǵan kezde pnevmonııaǵa ulasady. Ásirese jıi aýyratyn balalarda, júkti áıelderde, qart adamdarda, ımmýndyq jetispeýshiligi bar sozylmaly aýrýlarmen aýyratyn tulǵalarda tumaý aýyr ótedi. Júkti áıelderde túsik tastaý qaýpi joǵary», - deıdi ınfektsıonıst-dáriger Natalıa Pomazanova.
Mamandar vırýsty aýrýlar kúsheıgen kezde jeke bas gıgıenasyna asa mán berýge, tolyqqandy uıyqtap, dárýmenderge baı taǵam jeýge keńes beredi. Al tumaýdyń aldyn alýda arnaıy ekpe alý óz nátıjeliligin kórsetip keledi.
