SQO-da tumaý órship tur
PETROPAVL. QazAqparat – Soltústik Qazaqstan oblysynda sońǵy úsh aptada 100-ge jýyq adam tumaý juqtyrdy, aýyrǵandardyń shamamen ár úshinshisi – 14 jasqa deıingi bala, dep habarlaıdy QazAqparat tilshisi.
SQO óńirlik kommýnıkatsııalar qyzmetinde jedel respıratorlyq vırýsty ınfektsııa men tumaýdyń aldyn alý, óńirdegi epıdemıologııalyq jaǵdaı týraly brıfıng ótti.
SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, óńirde JRVI-men syrqattanýdan maýsymdyq ósý bar.
«Bıylǵy epıdemıologııalyq maýsymnan bastap SQO-da jedel respıratorlyq vırýsty ınfektsııany juqtyrýdyń 6280 jaǵdaıy tirkeldi. Aýyrǵandardyń 70 % - 14 jasqa deıingi balalar.
14 qazannan bastap oblysta tumaýmen aýyrǵandar anyqtala bastady. Oblysta V tıpti tumaýdyń zerthanalyq rastalǵan 82 jaǵdaıy tirkeldi.
Naýqastardyń ishinde 3 júkti áıel, 14 jasqa deıingi 30 bala bar. ıAǵnı aýyrǵandardyń 37% - bala, onyń ishinde 3-ýi balabaqsha tárbıelenýshisi, 17 oqýshy jáne 10-y úıde otyrǵan bala», - deıdi Arman Kúshbasov.
Tumaýmen aýyrǵandar sanynan Petropavldyń úlesi joǵary, 41 jaǵdaı tirkelgen.
«Tumaýdyń aldyn alýdyń tıimdi ádisteriniń biri - vaktsınatsııa. Tumaýǵa qarsy ekpe aýrýdyń asqynǵan aǵymynan, aýrýhanaǵa jatqyzýdan jáne ólimnen qorǵaıdy.
Oblysta qazan aıynyń basynan vaktsınatsııa júrip jatyr. Búgingi tańda 55,5 myń adam nemese halyqtyń 10,1 % egildi, olardyń 8 myńnan astamy medıtsına qyzmetkeri, 4 myń oqýshy, 500-ge jýyq júkti áıel. Vaktsınatsııaǵa reseılik úsh valentti «Grıppol plıýs» preparaty qoldanylyp jatyr», - deıdi Arman Kúshbasov.
Mamannyń aıtýynsha, jalpy 75 myń adamdy nemese oblys halqynyń 13,7 % vaktsınatsııalaý josparlanǵan.
