SQO-da tumaý órshidi
SQO óńirlik kommýnıkatsııalar qyzmetinde ótken brıfıngte oblystyq sanıtarııalyq-epıdemıologııalyq baqylaý departamentiniń basshysy Áset Jumataev óńirdegi epıdemıologııalyq ahýalǵa toqtaldy.
«Epıdmaýsym bastalǵaly jiti respıratorlyq vırýstyq ınfektsııalardyń 17663 jaǵdaıy tirkeldi, ótken jyldyń sáıkes kezeńimen salystyrǵanda bul 33 % kóp. Aýyrǵandardyń basym bóligi, 66 % - 14 jasqa deıingi balalar.
Budan bólek bıyl tumaýdy juqtyrǵandar sany da artqan. 14 qazannan oblysta tumaý aýrýy tirkele bastady. Oblysta V tıpti tumaýdyń zerthanalyq rastalǵan 215 jaǵdaıy jáne A tıpti tumaýdyń (H1N1) zerthanalyq rastalǵan 1 jaǵdaıy tirkeldi. Barlyq adamdar tumaýǵa qarsy ekpe almaǵan», - deıdi Áset Jumataev.
Mamannyń aıtýynsha, naýqastardyń 18-i júkti áıel, 73-i - 14 jasqa deıingi bala, sonyń ishinde 7-i balabaqsha tárbıelenýshisi, 50-i mektep oqýshysy jáne 23-i úıde otyrǵan bala.
Sondaı-aq tumaýmen aýyrǵandardyń jartysyna jýyǵy – oblys ortalyǵynyń turǵyndary.
«Tumaýmen vaktsına saldyrý arqyly kúresýge bolady. Búgingi tańda oblysta táýekel tobyna jatatyn 75 000 adam: medıtsına qyzmetkerleri, medıtsınalyq uıymda esepte turǵan balalar, balalar úıleriniń, tárbıelenýshileri, qarttar úıleriniń kontıngenti, epıdemıologııalyq kórsetkishter boıynsha 2-3 trımestrdegi júkti áıelder, sozylmaly aýrýlary bar adamdar, 65 jastan asqan adamdar bar. Olar ekpe aldy.
Tumaýǵa qarsy vaktsınatsııadan basqa, beıspetsıfıkalyq profılaktıkany nazardan tys qaldyrmaý kerek: betperde kııý, áleýmettik qashyqtyqty saqtaý, múmkindiginshe adam kóp jınalatyn oryndarǵa barmaý, jeke gıgıena erejelerin saqtaý qajet. Sonymen qatar, ımmýnıtetti barlyq qolda bar quraldarmen kóterý kerek», - deıdi departament basshysy.
Al aýyrǵan jaǵdaıda ınfektsııanyń odan ári taralýyn boldyrmaý úshin dárigerge qońyraý shalyp úıde bolý qajet.