SQO-da túlekterdiń 64% otandyq oqý oryndaryn tańdaǵan
«Qazir elde otyryp álemniń úzdik ýnıversıtetterinen bilim alý múmkindigi bar. Shetelde baryp oqý aýqymdy shyǵyn. Bir jyldyń ishinde oqý aqysyn qosa eseptegende shamamen 45 myń dollarǵa shyǵady. Sol bilimdi elde otyryp 10 myń dollarǵa ıgerýge bolady. Atap aıtqanda SQO-da ashylyp jatqan Arızona ýnıversıtetiniń fılıaly. Bul atqarylǵan jumystyń nátıjesi. Sheteldik joǵary oqý oryndarynyń fılıalyn óz elimizde ashý túlekterimizdiń syrtqa ketýin tejeýge de múmkindik beredi. Mysaly, SQO boıynsha sońǵy 5 jyldyń ishinde alǵash ret mektep túlekteriniń shetelge oqýǵa ketýi 2 ese azaıǵan», - dedi Eraly Toǵjanov elordada ótip jatqan «Adamı kapıtal – jańa Qazaqstan damýynyń negizgi resýrsy» atty ǵylym jáne joǵary bilim forýmynda.
Onyń aıtýynsha, atalǵan baǵyttaǵy jumysty jalǵastyrý kerek.
«Sonymen qatar bıyl SQO-da 64 paıyz mektep bitirýshi túlek otandyq oqý oryndaryn tańdap otyr. Bul sońǵy jyldaǵy eń joǵary kórsetkish. SQO-daǵy Arızona ýnıversıtetine elimizdiń 6 óńirinen stýdentter qabyldandy. Aldaǵy jyldary kórshi elderden de kelip oqıdy dep jobalap otyrmyz», - deıdi Úkimet basshysynyń orynbasary.
