SQO-da týǵandar sany qaıtys bolǵandardan asa almaı tur

PETROPAVL. KAZINFORM – Soltústik Qazaqstan oblysynda jyl basynan 2 254 náreste dúnıege keldi. Al jarty jylda 2 999 adam qaıtys bolǵan.

Ulttyq statıstıka bıýrosynyń SQO boıynsha departamentiniń málimetinshe, qazirgi ýaqytta óńirde 518 myń adam turady. Onyń ishinde 258 myń adam nemese 49,8% qalalarda, al 260 myń adam nemese 50,2% aýyldyq jerlerde turady.

Bıylǵy qańtar-maýsym aralyǵynda oblysta 2 254 náreste dúnıege keldi. Sábılerdiń 1 199-y – ul, 1 055-i – qyz. Jańa týǵandardyń 940-y, ıaǵnı 41,7% oblys ortalyǵynda tirkelgen. 

Aýdandar arasynda Ýálıhanov aýdanynda eń joǵary týý kórsetkishi tirkelgen. Odan keıin Aqjar aýdany jáne Shal aqyn aýdany keledi. Bala týýdan eń tómen kórsetkish Mamlıýt, Qyzyljar jáne Ǵ.Músirepov atyndaǵy aýdanda anyqtaldy. 

Al ólimniń negizgi sebepterine keler bolsaq, birinshi orynda 18,4% qan aınalymy júıesiniń aýrýlary keledi, ekinshi orynda 18,2% júıke júıesiniń aýrýlary, odan keıin tynys alý organdarynyń aýrýlary 14,4% tur. Esepti kezeńde qaıtys bolǵandardyń 10,3% qaterli isikterden, 9%-y – as qorytý organdarynyń aýrýlarynan, 6%-y – jazataıym oqıǵalar, ýlaný men jaraqattanýdan kóz jumdy. 

Osy aralyqta 1 309 neke tirkelip, 738 ajyrasý rásimdeldi. 

Buǵan deıin SQO-ǵa qonys aýdarýshylarǵa qandaı qoldaý sharalary bar ekenin jazǵan edik.