SQO-da týǵan qylmysker 23 jyl boıy Reseıde boı tasalap júrgen
PETROPAVLOVSK. QazAqparat - Reseıdiń Vologodsk oblysynda quqyq qorǵaý organdarynan 23 jyl boıy boı tasalap júrgen 57 jasar er azamat ustaldy, dep habarlaıdy QazAqparat Soltústik Qazaqstan oblystyq ishki ister departamentine silteme jasap.
1993 jyly qylmystyq polıtsııa qyzmetkerleri Taıynsha aýdanynda kisi óltirdi degen aıyppen kúdiktini izdestirip júrgen. Kırov aýdanynyń buryn sottalǵan turǵyny ishimdikke sylqııa toıyp alyp, óziniń aýyldasyna oq atqan. Oq tıgen azamat sol jaraqatynan kóz jumady. Al, ony atqan er adam quqyq qorǵaý organy qyzmetkerlerinen qashyp ketip, oǵan izdeý jarııalanady.
Soltústik Qazaqstannyń tártip saqshylary osy ýaqytqa deıin atalǵan azamattyń júrgen jerin anyqtaýmen bolǵan. 23 jyldan soń jedel qyzmetkerler onyń izine tústi. Ol Reseıdiń Vologodsk qalasynda bóten bireýdiń esimin jamylyp, boı tasalap júrgen. Qazaqstannyń tártip saqshylaryna reseılik quqyq qorǵaý organdarynyń ókilderi qoldaý kórsetken soń 57 jasar azamat qolǵa tústi.
Qazirgi tańda ol reseılik tergeý oqshaýlaǵyshtarynyń birinde qamaýda otyr. Endi ony Qazaqstanǵa ekstradıtsııalaý máselesi qozǵalýda.
Jyl basynan beri soltústikqazaqstandyq polıtseıler aýyr jáne asa aýyr qylmys jasaǵan 24 qylmyskerdi qolǵa túsirdi. Olardyń úsheýi buryn jasalǵan qylmystar.
