SQO-da týberkýlezben aýyrǵandarǵa qarjylaı kómek kórsetildi
PETROPAVL. QazAqparat – Soltústik Qazaqstan oblysynda bıyl týberkýlezben aýyrǵan 363 adamǵa 20 548 myń teńge áleýmettik kómek kórsetildi, dep habarlaıdy QazAqparat tilshisi.
SQO-da týberkýlezdiń aldyn alý maqsatynda jumys istep júrgen úkimettik emes uıymdardyń kezdesý-jıyny ótti. Oblystyq ftızıopýlmonologııa ortalyǵynyń málimetinshe, óńirde týberkýlezge qatysty epıdemıologııalyq jaǵdaı birshama turaqtanyp, syrqattaný men ólim-jitim kórsetkishi azaıǵan. Máselen 2010 jyly jańadan 625 syrqat anyqtalsa, byltyr 219 naýqas tirkelgen. Sondaı-aq ólim-jitim de kemigen, on jyl buryn 110 adam qaıtsa, byltyr 20 adam kóz jumǵan.
«SQO-da týberkýlezdi ıntegratsııalanǵan baqylaý strategııasy júzege asyrylady. Onyń aıasynda týberkýlez mıkrobakterııalaryn bólmeıtin jáne ózge jandarǵa qaýip tóndirmeıtin patsıentter turǵylyqty meken-jaıy boıynsha ornalasqan emhanada ambýlatorlyq em alady. Osy rette jyl basynan Petropavldaǵy 4 emdeý mekemesinde týberkýlezge qarsy kabınetter ashyldy. Olar ár aýdandyq aýrýhanada da jumys istep jatyr. Al M.Jumabaev aýdanynda bıyl ókpe aýrýymen aýyrǵandarǵa arnalǵan 30 oryndyq saýyqtyrý bólimshesi ashyldy», - deıdi SQO ftızıopýlmonologııa ortalyǵy dırektorynyń orynbasary Raısa Qusaıynova.
Bıyl SQO-da 264 myńnan astam adam flıýorografııa arqyly tekserilgen, nátıjesinde 101 adam esepke alyndy. Gxpert ádisi arqyly 2228 adamdy tekserilip, 169 adamnyń syrqattanǵany anyqtaldy. Qaralǵan 32 319 balanyń ekeýi juqtyrǵan bolyp shyqty.
«Oblysta epıdemıologııalyq jaǵdaıdyń jaqsarýyna týberkýlezben aýyrǵandarǵa kórsetilip jatqan qoldaý da sep bolǵan. 10 aýdanda aı saıyn 17 500 teńgeden, bir aýdanda 7900 teńgeden járdemaqy tólenedi. Mundaı áleýmettik kómek Petropavlda, Aqjar men Taıynsha aýdandarynda ǵana joq. 363 syrqatqa jergilikti bıýdjetten bıyl 20 548 myń teńge tólendi», - deıdi Raısa Qusaıynova.
