SQO-da týberkýlezben aýyratyndar sany azaıyp keledi
PETROPAVL. QazAqparat – Soltústik Qazaqstan oblysynda týberkýlez aýrýyn juqtyrǵandar sany azaıyp keledi, dep habarlaıdy QazAqparat tilshisi.
SQO ftızıopýlmonologııa ortalyǵynyń málimetinshe, byltyr óńir respýblıka boıynsha týberkýlezden kóz jumǵandar sany boıynsha 1-orynǵa shyqty. Alaıda oblysta epıdemıologııalyq jaǵdaı turaqtalyp keledi. Byltyr osy aralyqta qaýipti dertti 223 adam juqtyrsa, bıyl týberkýlezge shaldyqqandardyń qatary 25% tómendep, 156 adamdy qurady. Jalpy qazir mamandardyń esebinde týberkýlezdiń ashyq túrimen aýyratyn 478 adam tirkeýde tur.
«Týberkýlez – emi bar aýrý. Juqtyrdym eken dep qoryqpaý qajet. Týberkýlezdiń jeńil formasy 6-8 aıdyń ishinde emdeledi. Asqyndyryp alǵan jaǵdaıda emdelýge 20 aıǵa deıin ýaqyt qajet. Sondaı-aq, bul aýrýdyń ashyq jáne jabyq formalary bolady. Jabyq túri basqalarǵa juqpaıdy, ony emhanada dáriger nusqaýlaryn alyp úıde emdelesiz», - deıdi oblystyq ftızıopýlmonologııa ortalyǵynyń dáriger-ftızıatry Ásel Baqtybaeva.
Syrqattardyń tez saýyǵyp, qatarǵa qosylýyna olardyń ómirge degen qulshynysy áser etedi eken. SQO-da týberkýlez juqtyrǵandarmen jumys isteıtin «Senim-Soltústik» qoǵamdyq birlestigi bar. Bul joba óńirde birneshe jyldan beri jumys isteıdi. Mamandar syrqattarǵa negizinen psıhologııalyq kómek kórsetedi eken.
«Týberkýlez juqtyrǵan adamdardyń kópshiligi ómirden túńilip, sary ýaıymǵa salynady. Saldarynan em-dom nátıje bermeýi múmkin. Sol sebepti naýqasqa dertti jeńý úshin kómekshiler qajet. Biz mundaı azamattarǵa qolǵabys kórsetemiz. Psıhologtar óz keńesterin beredi», - deıdi qoǵamdyq birlestiktiń tóraǵasy Elena Qusaıynva.
Qoǵamdyq birlestiktiń mamandary probatsııa qyzmetimen de baılanys ornatqan. Byltyr jyljymaly rentgen uıymdastyryp, buryn sottalǵan 64 adam tekserildi. Olardyń tórteýinen týberkýlez anyqtaldy.
