SQO-da týberkýlezben aýyrǵandar sany artqan

PETROPAVL. KAZINFORM – Soltústik Qazaqstan oblysynda týberkýlezben aýyrý bir jylda 3,8% ósti. Flıýorografııa ádisimen byltyr týberkýlezben aýyratyn jańadan 191 naýqas anyqtalǵan.

Soltústik Qazaqstan oblystyq ftızıopýlmonologııa ortalyǵynyń málimetinshe, 2022 jyly 17 jasqa deıingi 10 balaǵa týberkýlez dıagnozy qoıylsa, byltyr 11 bala aýyrǵan. Jalpy 216 adamda bul dert alǵash anyqtalyp otyr. 

«Flıýorografııalyq tekserýden byltyr 336 myń adam ótti. 191 adamǵa týberkýlez dıagnozy qoıyldy. Budan bólek emhanaǵa 2783 adam týberkýlezge kúdikpen shaǵymdanyp, G-xpert ádisimen tekserýdiń nátıjesinde 257 adamda aýrý rastaldy. Dıaskın-test tekserýden 9498 bala ótip, onyń ishinde 286-synda oń nátıje boldy», — deıdi ftızıopýlmonologııa ortalyǵy dırektorynyń orynbasary Raısa Qusaıynova.

Petropavlda jáne oblystyń 6 aýdanynda «Senim-Soltústik» ÚEU jumys isteıdi.

Uıym syrqattardy anyqtaý jáne izdeý, qujattaryn qalpyna keltirý jáne aýyrǵan adamdarǵa psıhologııalyq keńes berý, materıaldyq kómek kórsetý, aıyppuldardy tóleý boıynsha jumys júrgizedi. 

Máselen byltyr turmysy tómen otbasylardan 23 syrqat anyqtalyp, emdeýden qashyp júrgen 30 adam qaıtarylǵan. 

«Týberkýlezben aýyratyn barlyq syrqatqa áleýmettik qoldaý bar. Petropavl boıynsha máslıhat sessııasynda týberkýlezben aýyratyn naýqastarǵa áleýmettik járdemaqy tóleý týraly sheshim qabyldandy. 2023 jyly 438 syrqat jalpy 60 mln teńge kómek aldy. Bul 2022 jylmen salystyrǵanda eki ese kóp soma», — deıdi Raısa Qusaıynova.

Buǵan deıin «Týberkýlezden álemdi jaryqtandyr» halyqaralyq naýqanyna Petropavldyń bıyl da qatysyp, oblystyq fılarmonııa ǵımaraty qyzyl túspen jaryqtandyrylatynyn aıtqan edik.