SQO-da týberkýlez juqtyrǵan 170 naýqas úı jaǵdaıynda em qabyldap jatyr
PETROPAVL. KAZINFORM - Zamanaýı tásilderdiń arqasynda aýrýdy emdeý merzimi qysqaryp, patsıentterdiń bir bóligi em-domdy ambýlatorııalyq, ıaǵnı úı jaǵdaıynda alatyn bolǵan.
Soltústik Qazaqstan oblysy ftızıopýlmonologııa ortalyǵynyń málimetinshe, qazirgi dıagnostıkalyq ádister aýrý qozdyrǵyshynyń dárige sezimtaldyǵyn anyqtaýǵa jáne soǵan sáıkes tıimdi emdeý shemasyn tańdaýǵa múmkindik beredi.
Qazaqstanda týberkýlezdi dıagnostıkalaý jáne emdeý, sondaı-aq naýqastardy qajetti dári-dármekpen qamtamasyz etý kepildik berilgen tegin medıtsınalyq kómek kólemi aıasynda tegin júrgiziledi.
SQO-da 2025 jyldyń mamyr aıynan bastap dárige tózimdi týberkýlezdi emdeýge arnalǵan alty aılyq BPaLM/BPaL rejımderi qoldanylyp keledi. Osy emdeý shemalary boıynsha 17 naýqas em qabyldaǵan. Onyń ishinde 13 adam emdeý kýrsyn tolyq aıaqtap, «saýyǵý» nátıjesine qol jetkizip, tolyq saýyqty.
Mamandardyń aıtýynsha, jańa tásilderdiń negizgi artyqshylyqtarynyń biri - emdeý uzaqtyǵynyń qysqarýy jáne ınektsııalyq preparattardy uzaq ýaqyt qoldaný qajettiliginiń azaıýy.
Dertten aıyǵyp ketý úshin dáriger taǵaıyndaǵan emdeýdi der kezinde bastaý jáne kýrstan tolyq ótý shart. Naýqastyń jaǵdaıy jaqsarsa da, em-domdy úzbeı sońyna deıin jalǵastyrý kerek. Dárigerler emdeý barysynda naýqastyń jaýapkershiligi mańyzdy ekenin aıtady. Dárini qabyldaý ýaqytyn ótkizip alý, emdi merziminen buryn toqtatý nemese dárigermen keńespeı emdeý shemasyn ózgertý terapııanyń tıimdiligin tómendetip, aýrý qozdyrǵyshynyń dárige tózimdiligin qalyptastyrýy múmkin.
Osyǵan deıin SQO-da bıyl týberkýlezben aýyrýdyń 70-ke jýyq jańa jaǵdaıy tirkelgenin jazǵan edik.
