SQO-da týberkýlez naýqastaryna 28 mln teńgege jýyq járdemaqy berildi
SQO týberkýlezge qarsy qyzmetiniń málimetinshe, óńirdegi epıdemıologııalyq jaǵdaı turaqty, aýrýdy juqtyrǵandar sany azaıyp keledi. Buǵan atqarylyp jatqan keshendi is-sharalar, qajetti preparattardyń qoljetimdigi, jańa emdeý tásilderiniń engizilýi sebep.
«Sońǵy 10 jylda týberkýlezben aýyrý kórsetkishi oblysta ǵana emes, jalpy el boıynsha 2,5 esege tómendedi. Ólim-jitim 3,9 ese tómendedi. Desek te, oblysta bul kórsetkish respýblıka boıynsha joǵary. 2011 jyly 68 syrqat qaıtys bolsa, 2021 jyly 16 adam kóz jumdy», - deıdi SQO ftızıopýlmonologııa ortalyǵynyń dırektory Qanysh Bıjanov.
Týberkýlezben kúrestiń tıimdi joly – ony der kezinde anyqtaý. SQO-da aýrýdy erte anyqtaýda zamanaýı dıagnostıka tásilderi qoldanylady. Mamandar turǵyndardyń 80 % tekserispen qamtýǵa tyrysady.
«Byltyr flıýorografııamen 324 223 adam tekserildi. 153 syrqat anyqtaldy. Gxpert ádisimen 3 415 turǵyn tekserilse, sonyń 246-sy týberkýlez tabyldy. Budan bólek 40 409 baladan synama alyndy, úsheýiniń nátıjesi oń keldi», - deıdi Qanysh Bıjanov.
Mamannyń aıtýynsha, óńirde epıdemıologııalyq jaǵdaıdyń jaqsarýyna syrqattardy áleýmettik qoldaý da áser etken. Oblystyń 11 aýdanynda týberkýlezben aýyratyndarǵa aı saıyn 17 502 teńge járdemaqy beriledi. Shal aqyn aýdanynda – 7 900 teńge, Taıynsha jáne Aqjar aýdandarynda mundaı kómek toqsanda bir ret qana kórsetiledi, somasy 20 myń jáne 14 myń teńge shamasynda. Al Petropavlda syrqattarǵa jylyna bir ret 29 myń teńge beriledi eken. Byltyr jergilikti bıýdjetten osy maqsatqa 28 mln teńgege jýyq qarjy jumsalǵan.
