SQO-da týabitti júrek aqaýymen 800-den astam bala bar
Soltústik Qazaqstan oblysynda týabitti júrek aqaýy bar balalardy ulttyq ǵylymı medıtsına ortalyǵynan kelgen mamandar qabyldap jatyr. Qazirgi ýaqytta osy dıagnoz qoıylǵan 817 bala dárigerlerdiń baqylaýyna alynǵan, dep habarlaıdy Kazinform.
Astanadaǵy ulttyq ǵylymı medıtsına ortalyǵynyń mamandary Petropavlǵa jylyna eki ret kelip, oblystyq balalar aýrýhanasynda kishkentaı syrqattardy qabyldaıdy. Bilikti kardıohırýrgtardyń mindeti – dıspanserlik esepte turǵan balalardyń jaǵdaıyn baıqap, qajet bolǵan jaǵdaıda otaǵa daıyndaý.
«Sapar barysynda kardıologııalyq jáne kardıohırýrgııalyq kómekti qajet etetin barlyq balany qamtımyz. Osy jerde ÝZI-ge túsiremiz, elektrkardıogramma jasaımyz. Júrektiń týabitti aqaýlaryn anyqtaý maqsatynda, dıagnoz qoıylǵan jaǵdaıda ári qaraı emdeýdi belgileý úshin qajetti zertteýlerden ótkizemiz.
Balalardyń derti asqynsa, jaǵdaıy aýyrlasa, Astanaǵa joldama beremiz. Ulttyq ǵylymı-medıtsınalyq ortalyqta tolyq tekserýden ótkizip, ota jasalady. Qalǵandary osynda kardıologtardyń baqylaýynda bolady. Ońaltýdan ótedi, statsıonarǵa jatqyzylyp, em alady. Kelesi joly kelgende taǵy da zerttep, ózgeristi baıqap, soǵan qaraı shara qoldanamyz», - deıdi Ulttyq ǵylymı medıtsınalyq ortalyqtyń kardıohırýrgy Rınat Maıorov.
Mamannyń aıtýynsha, týabitti júrek aqaýyn qazir bala anasynyń qursaǵynda jatqanda ÝZI arqyly anyqtaýǵa bolady. Júrek aqaýynyń neden bolatynyn naqty aıtý múmkin emes, sebebi kóp, sonyń biri - tuqymqýalaý. Eger áıel adam júktilik kezinde qandaı da bir aýrýmen aýyryp, antıbıotık qabyldaǵan bolsa sonyń zııany balaǵa áser etý múmkin. Sonymen qatar, ekologııa men durys tamaqtanbaý da áser etip, derttiń damýyna ákelýi yqtımal.
«Týabitti júrek aqaýynyń birneshe túri bolady. Jeńil bolsa keıbir shekteýlerdi ustanyp, mamandardyń baqylaýynda bolady. Al aýyr túrinde ota jasalyp, keıin ol da qalypty ómir súrý saltyna kóshedi», - deıdi astanalyq kardıohırýrg.
Astanalyq dárigerler eki kúnnen beri qabyldaý júrgizip jatyr. Bir kúnniń ózinde olar 80-nen astam balany tekserip úlgerdi.
