SQO-da traktor qurastyrý úshin sheteldik kompanııamen kelissóz júrip jatyr
PETROPAVL. QazAqparat - SQO-da aýylsharýashylyǵy tehnıkalary: traktor, sebý keshenderi men kombaındar jergilikti mashına jasaý zaýytynda qurastyrylatyn bolady. Búgingi tańda nemistiń CLAAS kompanııasymen kelissóz júrip jatyr, dep habarlaıdy QazAqparat tilshisi.
SQO Іshki saıasat basqarmasynyń málimetinshe, óńirde CLAAS XERION markaly traktor, «Horsh» sebý keshenderi jáne CLAAS TUCANO markaly kombaındardy qurastyryp shyǵarý josparlanǵan.
Mamandardyń aıtýynsha, byltyr Nur-Sultan qalasynda ótken XI ekonomıkalyq forým aıasynda SQO ákimdigi men Shyǵys Eýropa boıynsha CLAAS kompanııasynyń dırektory Nıls Roıtch arasynda jobany júzege asyrý boıynsha memorandýmǵa qol qoıyldy.
SQO aýylsharýashylyǵy basqarmasynyń málimetinshe, kelissóz 2017 jyldan bastap júrgizilip keledi. CLAAS kompanııasynyń tehnıkasy «Qaztehmash» mashına jasaý zaýyty» JShS bazasynda qurastyrylmaqshy. Jergilikti kásiporyn ǵımarat pen óndiristik alańdar usynsa, sheteldik kompanııa tehnologııamen, qurastyrý jelisimen jáne qajetti qondyrǵymen qamtamasyz etedi.
Mamandardyń aıtýynsha, «CLAAS» SQO-da aýylsharýashylyǵy tehnıkasyn qurastyryp qana qoımaı, bolashaqta ónimdi álem boıynsha ótkizýge kómektespek. Kásiporyn jylyna CLAAS TUCANO markaly 100 kombaıyn qurastyrýdy josparlaǵan, nátıjesinde 80 adam turaqty jumyspen qamtylady. Tolyq qýatynda jylyna 200-ge deıin aýylsharýashylyǵy tehnıkasyn shyǵarýǵa qaýqarly.
SQO aýylsharýashylyǵy basqarmasynyń málimetinshe, óńirdegi aýylsharýashylyǵy tehnıkasy aıtarlyqtaı eskirgen. Traktorlardyń 84 % (11 416 dana), kombaıyndar 68% (5056 dana) 10 jyldan artyq qoldanysta bolǵan, ıaǵnı aýystyrýdy qajet etedi. Kásiporyn iske qosylǵan jaǵdaıda oblystyń mashına-traktor parki sapaly túrde jańalanbaq.
