SQO-da tótenshe jaǵdaı rejımin buzǵan bar ıesi 5 kúnge qamaýǵa alyndy
PETROPAVL. QazAqparat – Soltústik Qazaqstan oblysynda arnaıy toptar reıdke shyǵyp, oıyn-saýyq jáne qoǵamdyq tamaqtaný oryndarynda tótenshe jaǵdaı rejımine saı jumys isteý tártibiniń oryndalýyn tekserdi, dep habarlaıdy QazAqparat tilshisi.
SQO Polıtsııa departamenti baspasóz qyzmeti málimetinshe, reıdke Petropavl qalalyq polıtsııa basqarmasynyń qyzmetkerleri, sanıtarlyq dárigerler jáne kásipkerlik bóliminiń mamandary shyǵady. Olar dámhana, meıramhana, barlar men ashanalardyń, kóńil kóterý oryndarynyń jumysyn tekseredi.
19-20 naýryz kúnderi ótken osyndaı reıdterde kóptegen zańbuzýshylyqtar anyqtaldy. Oblysta túngi saǵat 22.00-den keıin oıyn-saýyq ortalyqtarynyń jumysyna shekteý qoıylǵan. Alaıda keıbir kásipkerler tótenshe jaǵdaı kezindegi tártipti elemeıtin bolyp shyqty. Olardyń qatarynda «Kamelot», «Krevetka», «Rafınatto», «Inter» dámhanalarynyń ıeleri bar. Ákimshilik quqyqbuzýshylyqqa jol bergen olar birinshi ret eskertilse, keıin 10 AEK kóleminde aıyppul tóleýi nemese 15 táýlikke deıin qamaýǵa alynýy múmkin. Protsessýaldyq sheshimdi Petropavl qalalyq mamandandyrylǵan ákimshilik soty shyǵarady.
Shekteýge qaramastan oblys ortalyǵyndaǵy «№1 Boýlıng ortalyǵy», «Pıvko» bar-dúkeni, «Mesto vstrechı», «Prıchal», «Ahtamar», «Marııa», «Rýs», «Doner kebab», «Barbarıs», «Granat» dámhanalary da jumys istegen. Anyqtalǵan derekter boıynsha hattamalar toltyrylyp, sotqa jiberý úshin materıal jınaldy.
Petropavl qalalyq mamandandyrylǵan ákimshilik soty kóńil kóterý oryndarynyń eki ıesin jaýapqa tartty. Dámhana ıesi 10 AEK – 26 myń 500 teńge aıyppul tólese, bar ıesi, áıel adam 5 kúnge ákimshilik qamaýǵa alyndy.
«Tótenshe jaǵdaı rejıminiń oryndalýy boıynsha reıdter aldaǵy kúnderi jalǵasyn tabady. Іndettiń taralýyna jol bermeý maqsatynda qolǵa alynǵan is-sharaǵa kóptegen kásipkerler túsinistik tanytqan. Tótenshe jaǵdaı rejımi kezindegi erejelerdi saqtaý arqyly halyq sanıtarly-gıgıenalyq talaptardy jáne qajetti basqa da usynystardy oryndaýǵa úırenedi», - dedi SQO PD bastyǵynyń birinshi orynbasary Qanat Aıtbaev.
