SQO-da tótenshe jaǵdaı rejımin buzǵan 64 adam qamaýǵa alyndy
PETROPAVL. QazAqparat – Soltústik Qazaqstan oblysynda tótenshe jaǵdaı rejımin buzǵandardyń sany artqan. Tek ótken demalys kúnderi ǵana 63 adamǵa ákimshilik jaza qoldanyldy, dep habarlaıdy QazAqparat tilshisi.
Bul jaıynda oblys ákiminiń orynbasary Rýslan Álishev aıtty.
Onyń aıtýynsha, tótenshe jaǵdaı jarııalanǵannan beri óńirde tártipti buzýdyń 345 deregi tirkelgen. 281 jaǵdaıda turǵyndar páterlerinen esh qajettiliksiz shyqqan, sonyń ishinde 19-y jasóspirimderdiń úlkenderdiń qaraýynsyz júrýine, 6-ýy karantındik rejımdi buzýǵa qatysty.
Al ótken senbi-jeksenbi kúnderi tártip saqshylary 63 adamǵa «Tótenshe jaǵdaı rejımin buzý» baby boıynsha, ıaǵnı kóshede beısaýat júrgenderi úshin ákimshilik hattama toltyrdy.
«Turǵyndar aýlalarǵa balalaryn oınaýǵa jiberip nemese ózderi ertip shyǵyp karantındik rejımdi buzyp jatyr. Tártipti buzǵandary úshin jazaǵa tartylady. Polıtseıler eskertip qana qoımaı, qatań shara qoldanady. Osy kúnge deıin sottar 224 materıaldy qarady. 64 adamǵa ákimshilik qamaýǵa alý jazasy kesilip, 155 adam 10 AEK mólsherinde aıyppul tóledi», - deıdi Rýslan Álishev.
Oblys ákiminń orynbasary áleýmettik jelilerde jalǵan aqparat taratqandarǵa da jaza barlyǵyn eskertti.
«Áleýmettik jelilerge monıtorıng júrgizý barysynda shyndyqqa janaspaıtyn aqparat taratýdyń eki deregi anyqtaldy. Negizinen oblys aýmaǵynda qaýipti indet taralýynyń jalǵan faktileri týraly jazylǵan. Ekeýi boıynsha da qylmystyq is qozǵaldy. Quqyq buzýshylardyń endi 3 jyldan 7 jylǵa deıin bostandyǵy shektelýi nemese osy ýaqyt aralyǵyna bas bostandyǵynan aıyrylýy múmkin», - deıdi oblys ákiminiń orynbasary.
Buǵan deıin SQO-nyń bas sanıtarlyq dárigerdiń qaýlysymen 21 sáýirden bastap karantın rejıminiń kúsheıtiletindigin aıtqan edik.
