SQO-da tótenshe jaǵdaı kezinde jalǵan aqparat taratýshy jazalandy
PETROPAVL. KAZINFORM – Soltústik Qazaqstan oblysynda sý tasqynyna qatysty jalǵan aqparat taratyp, halyq arasynda dúrbeleń týdyrýshylar jazalanyp jatyr. Polıtseıler oblys turǵyndary men qonaqtarynan tek resmı aqparatqa ǵana senýdi suraıdy.
SQO polıtsııa departamenti baspasóz qyzmetiniń málimetinshe, TikTok áleýmettik jelisinde Petropavldaǵy sý basqan Oıqala aýdanynda sýmen birge qasqyrlar men jabaıy qabandar paıda boldy degen habarlama shyqty. Polıtseıler jalǵan aqparat taratýshyny tezarada anyqtady, ol — 20 jastaǵy Petropavl turǵyny bolyp shyqty.
Sol shamalas taǵy bir boıjetken dál osy áleýmettik jelide tasqyn sýdan eki bala qaıtys boldy degen jalǵan aqparat taratqan.
«Shyndyqqa sáıkes kelmeıtin aqparatty taratýshylardyń ekeýine de qatysty ákimshilik materıal jınalady. QR Ákimshilik quqyq buzýshylyq týraly Kodeksiniń 456-2 babynyń 3-bóligine sáıkes „Jalǵan aqparat ornalastyrý, taratý“ boıynsha 20 aılyq eseptik kórsetkishke deıin aıyppul salynady», — dep habarlady SQO PD ekstremızmge qarsy is-qımyl basqarmasy mamandary.
Buǵan deıin SQO-da bir táýlikte 400-den astam turǵyn úıdiń sý astynda qalǵanyn aıtqan edik.
