SQO-da tórt mektepke qazaq zııalylarynyń esimderi berildi

PETROPAVL. QazAqparat – Soltústik Qazaqstan oblysyndaǵy úsh orta mektepke jáne bir sport mektebine qazaq zııalylary – Álıhan Bókeıhanulynyń, Ahmet Baıtursynulynyń, Smaǵul Sádýaqasovtyń jáne Qajymuqan Muńaıtpasulynyń esimderi berildi, dep habarlaıdy QazAqparat tilshisi.

6 sáýirdegi QR Úkimetiniń qaýlysyna sáıkes, endi Petropavldaǵy №25 orta mektep Álıhan Bókeıhanulynyń, №9 orta mektep Ahmet Baıtursynulynyń, №2 orta mektep Smaǵul Sádýaqasovtyń esimimen atalady. Al ulttyq sport túrleri boıynsha balalar-jasóspirimder sport mektebine Qajymuqan Muńaıtpasulynyń esimi berildi.

«Bul baǵyttaǵy jumystar áli de jalǵasady. Naýryz aıynda oblystyq onomastıkalyq komıssııasynda óńirdiń belgili tulǵalarynyń esimderin berý boıynsha usynys qaralǵan. Ol bir aýyzdan qoldaý tapty. Qazirgi ýaqytta qujattar respýblıkalyq onomastıkalyq komıssııaǵa joldandy. Aıtyp ótsek, mádenıet jáne bilim nysandaryna - Jambyl aýdanyndaǵy kitaphanaǵa Safýan Sháımerdenovtyń, Shal aqyn aýdanyndaǵy Sergeevka orta mektebine Kákimbek Salyqovtyń, Qyzyljar aýdany Novonıkolsk aýylyndaǵy mektepke Gennadıı Zenchenkonyń esimin berý usynysy joldandy», - deıdi SQO Mádenıet, tilderdi damytý jáne arhıv isi basqarmasynyń basshysy Dosbol Ábdirısov.

Eske sala keteıik, Soltústik Qazaqstan oblystyq máslıhaty 7-shaqyrylymnyń depýtattary óńir belsendileriniń usynysyn qoldap, kezekten tys ótken sessııada Petropavldaǵy bilim berý jáne sport nysandarynyń tórteýine qazaqtyń birtýar uldarynyń esimderin berý týraly sheshim qabyldaǵan edi. Keıin tıisti qujattar respýblıkalyq onomastıkalyq komıssııa qaraýyna joldandy. Jalpy, óńirde ıdeologııalyq turǵydan eskirgen eldi meken, jer-sý ataýlary jáne olardyń quramdas bólikterin tarıhı ataýlarymen ózgertý jumystary josparly túrde jalǵasyp keledi.