SQO-da tórt kúnde 141 óńir turǵyny maly bos júrgeni úshin jazalandy

PETROPAVL. QazAqparat – Soltústik Qazaqstan oblysynda mal urlyǵymen kúresý maqsatynda respýblıkalyq jedel-profılaktıkalyq is-sharasy ótti. Nátıjesinde bes mal urlyǵy qylmysy ashyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, «Mal urlaýshy» respýblıkalyq jedel-profılaktıkalyq is-sharasy 15-18 mamyr aralyǵynda ótti. Mobıldik toptar qurylyp, olardyń quramyna krımınaldyq jáne ákimshilik polıtsııa, veterınarııa basqarmasynyń qyzmetkerleri kirdi. 4 kún ishinde olar mal men et ónimderin tasymaldaıtyn 411 avtokólikti tekserdi. Nátıjesinde veterınarııa salasyndaǵy 28 ákimshilik quqyq buzýshylyq anyqtaldy.

Sondaı-aq mal men et ónimderin satý oryndary, sharýa qojalyqtary, eldi mekenderden alys ornalasqan mal qamaıtyn oryndar men fermalar tekserildi.

«Іs-shara aıasynda buryn jasalǵan 5 mal urlyǵy ashyldy, onyń 4-ýi «ótken jyldar» sanatynda. 141 soltústikqazaqstandyq maldaryn bos qoıa bergeni úshin ákimshilik jaýapkershilikke tartyldy. Qańǵyrǵan mal – urylarǵa ońaı olja. Al eldi mekender mańyndaǵy joldarda janýarlardyń kenetten paıda bolýy jol-kólik apatyna alyp kelýi múmkin. Sondyqtan polıtsııa turaqty túrde aldyn alý jumystaryn atqarady», - deıdi SQO PD krımınaldyq polıtsııa basqarmasynyń bastyǵy Marat Jumalıev.

Respýblıkalyq aktsııa aıasynda Aqqaıyń aýdanynda 46 jastaǵy aýyl turǵynynyń úıine japsarlas salynǵan qora-qopsydan polıtseıler 16 kalıbrli «IJ-58» markaly tirkelmegen myltyqty tapty. Saraptama taǵaıyndaldy.

QR Ákimshilik quqyq buzýshylyq týraly kodeksiniń 482-babyna sáıkes er adam 20 AEK mólsherinde aıyppul tóleýi múmkin.