SQO-da tórt aıda 33 adam kókjótelmen aýyrǵan

PETROPAVL. KAZINFORM – Soltústik Qazaqstan oblysynda tórt aıda 33 adamǵa «kókjótel» dıagnozy qoıyldy. Aýyrǵandardyń basym bóligi dertke qarsy ekpe almaǵan.

SQO sanıtarııalyq-epıdemıologııalyq baqylaý departamenti «Petropavl qalasyndaǵy kókjótel boıynsha epıdemıologııalyq jaǵdaı» taqyrybynda brıfıng ótkizdi. Óıtkeni sońǵy tórt aıda aýyrǵan 33 adamnyń 28-i – Petropavl turǵyny. Kókjótel aýrýy sáýirde asqynyp, syrqattanǵandardyń 46% osy aıda tirkelgen. 

«Aýyrǵandardyń barlyǵy – 14 jasqa deıingi bala. Olardyń basym bóligi kókjótelge qarsy vaktsına almaǵan. Mysaly Petropavlda 20 jaǵdaıda ata-analary vaktsınadan bas tartqan, 6 jaǵdaıda medıtsınalyq qarsy kórsetilim bolǵan. Bir balanyń ekpe qoıýǵa jasy jetpegen. Kókjótelge qatysty turaqsyz epıdemıologııalyq jaǵdaı bolǵanyna qaramastan Petropavlda 2,3,18 aı jáne 6 jastaǵy balalardy AbKDS bar vaktsınalarmen tolyq qamtý (keminde 95%) múmkin bolmaı otyr. Saldarynan aýrýdyń ári qaraı jaıylýyna, basqa da «umtyla» bastaǵan vaktsınamen basqarylatyn ınfektsııalardyń tirkelýine ákelýi múmkin», - deıdi Petropavl qalalyq sanıtarııalyq-epıdemıologııalyq baqylaý basqarmasynyń bas mamany Juldyz Bekmaǵambetova. 

Mamannyń aıtýynsha, vaktsınamen kókjóteldiń aldyn alýǵa bolady. Elimizde osy ınfektsııaǵa qarsy vaktsınatsııa balalarǵa Ulttyq egý kúntizbesine sáıkes 2,3,4,18 aı jáne 6 jasynda medıtsınalyq uıymdarda jáne bilim berý mekemelerinde tegin júrgiziledi. 

«Qazirgi ýaqytta Petropavlda buryn vaktsınatsııalanbaǵan 18 jasqa deıingi balalarǵa vaktsınamen basqarylatyn kóptegen ınfektsııalarǵa, sonyń ishinde kókjótelge qarsy ımmýndaý júrgizilip jatyr. Sondyqtan balalaryńyzdy túrli dertten qorǵaǵyńyz kelse, barlyq qajetti profılaktıkalyq ekpelerdi alýlaryńyz qajet, aýrýdy emdegennen góri aldyn alý ońaı», - deıdi Juldyz Bekmaǵambetova. 

Buǵan deıin SQO-da sarbazdardyń joǵary oqý ornynda tegin oqýǵa grant alǵanyn aıtqan edik.