SQO-da tórt aýyl ákimi bıýdjet qarajatyn ıgerýde zańbuzýshylyqtarǵa jol bergen
PETROPAVL. KAZINFORM – Soltústik Qazaqstan oblysynda mal qorymdaryn salýǵa bólingen bıýdjet qarajatynyń ıgerilýi tekserilip, nátıjesinde jobalyq qujattama men naqty oryndalǵan jumystar arasynda eleýli sáıkessizdikter anyqtaldy.
Memlekettik qyzmet isteri agenttiginiń oblystyq departamentiniń málimetinshe, Qyzyljar aýdanyndaǵy tórt – Sokolov, Roşın, Asanov jáne Qyzyljar aýyldyq okrýg ákimderine qatysty qyzmettik tergep-tekserý júrgizildi. Oǵan Qyzyljar aýdany prokýratýrasynyń materıaldary men aýdan ákimdigi apparatynyń haty negiz bolǵan. Tekserý barysynda memlekettik satyp alý rásimderin júzege asyrýda zań talaptary saqtalmaǵany belgili bolǵan.
Byltyr aýyldyq okrýgterdiń ákimdik apparattarynyń úsheýi «Aýbakırova» jeke kásipkerligimen jáne bireýi «Sholpan» JK mal qorymdaryn ornatý jáne abattandyrý boıynsha memlekettik satyp alý sharttaryn jasaǵan. Árqaısysynyń quny – 6,8 mln teńge.
– Jobalyq-smetalyq qujattamaǵa sáıkes mal qorymynyń aýmaǵy daıyn kúıinde jetkiziletin metall symdardan jasalǵan 3D úlgisindegi qorshaýmen qorshalýy tıis bolǵan. Qorshaý 31 sektsııadan turýy jáne qaýipsizdik úshin arnaıy bógetpen jabdyqtalýy qajet edi. Sonymen qatar nysanǵa elektrli júk kótergish qurylǵy ornatý kózdelgen. Smeta boıynsha qorshaýdyń quny 2,7 mln teńgeden assa, elektrli lebedkany ornatýǵa 158 myń teńge bólingen, - deıdi Memlekettik qyzmet isteri agenttiginiń SQO boıynsha departamentiniń sybaılas jemqorlyqtyń aldyn alý basqarmasynyń bas mamany Sultanbek Sakıbaev.
Alaıda 2026 jyldyń sáýir aıynda prokýratýra qyzmetkerleri júrgizgen tekserý barysynda salynǵan mal qorymdarynyń smetalyq qujattarǵa sáıkes kelmeıtinin anyqtaǵan. Jobada kórsetilgen arnaıy metall qorshaýlardyń ornyna qarapaıym profıl qoldanylǵan. Sondaı-aq keıbir jabdyqtardyń múlde qoıylmaǵany anyqtalǵan.
– Soǵan qaramastan aýyldyq okrýg ákimderi oryndalǵan jumystar aktilerine qol qoıyp, merdigerlerge shart boıynsha qarajattyń tolyq kólemde tólenýine kelisim bergen. Memlekettik qarajattyń maqsatty ári tıimdi jumsalýyn qamtamasyz etý - memlekettik qyzmetshilerdiń negizgi mindetteriniń biri. Tergep-tekserý barysynda ákimderdiń áreketterinde quqyq buzýshylyq belgileri bar degen qorytyndy jasaldy, - deıdi Sultanbek Sakıbaev.
Ádep jónindegi keńes máseleni qarap, memlekettik qyzmet bedeline nuqsan keltiretin tártiptik teris qylyq jasaǵany úshin tórt ákimge qatysty «tolyq emes qyzmettik sáıkestik týraly eskertý» túrindegi tártiptik jaza qoldanýdy usyndy.
Buǵan deıin Qyzylorda oblysynda 52 memlekettik qyzmetker tártiptik jazaǵa tartylǵanyn jazǵan edik.
