SQO-da tórt aýdanda jol jabyldy
PETROPAVL. QazAqparat – Soltústik Qazaqstan oblysynda aýa raıynyń nasharlaýyna baılanysty tórt aýdanda oblystyq mańyzy bar joldar jabyldy, dep habarlaıdy QazAqparat tilshisi.
Oblys aýmaǵynda aýa raıy taǵy da qubylyp tur. Jel kúsheıip, boran soǵyp, jaýyn jaýady, jol nashar kórinedi.
«18:30-dan bastap aýa raıynyń qolaısyzdyǵyna baılanysty barlyq kólik túrleri úshin oblystyq mańyzy bar avtomobıl joldarynyń Aıyrtaý, Tımırıazev, Shalaqyn jáne Ǵ.Músirepov atyndaǵy aýdandardaǵy bólikterinde qozǵalys shekteldi», - delingen «Darmen» mobıldi qosymshasy arqyly qutqarý qyzmeti taratqan habarlamada.
TJ departamenti baspasóz qyzmetiniń habarlaýynsha, ótken aptada jaýyn-shashyn men kóktaıǵaqqa baılanysty respýblıkalyq mańyzy bar 7 jol ýchaskesinde 6 ret jol jabylǵan. Biraq bul keleńsiz jaǵdaılardyń aldyn alýǵa yqpalyn tıgizbedi.
«Bir apta ishinde oblystyń avtojoldarynan departament, jergilikti polıtsııa qyzmeti, atqarýshy organdar, «Qazavtajol» JShS qyzmetkerleriniń kómegimen 95 adam qar qursaýynan qutqarylǵan, 18 jeńil avtokólik jáne 18 júk kóligi tazartylǵan jol ýchaskelerine shyǵaryldy «, - dep atap ótti daǵdarys jaǵdaılarynda basqarý basqarmasynyń basshysy Rústem Jumaǵalıev.
Sınoptıkterdiń boljamynsha, aldaǵy ýaqytta aýa raıy nasharlaýy múmkin.
