SQO-da topyraqqa kómilgen 20 jastaǵy jumysshy tiri qaldy

PETROPAVL. KAZINFORM – Soltústik Qazaqstan oblysy Aqjar aýdanynda jumys istep júrgen 20 jastaǵy jigittiń ústine balshyq qulap ketti. Aýyr halde túsken zardap shegýshini dárigerler aman alyp qaldy. 

Oqıǵa 11 maýsym kúni bolǵan. SQO kópbeıindi aýrýhanaǵa Aqjar aýdandyq aýrýhanadan habarlasyp, aýyr syrqat túskenin aıtqan.

«Áriptester er adam bas súıek-mı jaraqatyn alýy múmkin, keýdesi qysylǵan, mıdyń gıpoksııasy tirkelgendigin aıtty. Óndiristik jaraqat, ıaǵnı jigittiń ústine balshyq qulap ketken, saldarynan ol bir ýaqyt topyraq astynda jatyp qalǵan. Birden aýdandyq aýrýhanaǵa jetkizilip, alǵashqy kómek kórsetildi. Reanımatologqa keńes berdim, qandaı em-dom júrgizý kerektigin aıttym, óıtkeni sol ýaqytta syrqattyń jaǵdaıy ony jedel túrde oblys ortalyǵyna jetkizýge múmkindik bermedi. Sol sebepti aýdandyq aýrýhanada jigit ókpeni jasandy jeldetý apparatyna qosyldy. Al ekinshi kúni jaǵdaıy turaqtalǵannan keıin san avıatsııa arqyly oblystyq aýrýhanaǵa jetkizildi», - deıdi SQO-nyń shtattan tys bas anestezıolog-reanımatologi Sergeı Ishın.

Oblystyq aýrýhanaǵa jetkizilgen kezde polıjaraqat alǵan syrqattyń jaǵdaıy aýyr bolǵan. 

«Konsılıým qurylyp, barlyq qajetti zertteý, sonyń ishinde tolyq KT jasaldy. Tekseris bas-mı jaraqatyn kórsetpedi, alaıda qabyrǵalary synyp, keýde qýysyna zaqym kelgen, eki jaqty pnevmonııa dıagnozyn qoıdyq. Syrqat alty táýlik boıy jansaqtaý bóliminde jatty. Qazirgi ýaqytta esin jıdy, ózdiginen dem alyp jatyr. Búgin pýlmonologııa bólimine aýystyrdyq», - deıdi Sergeı Ishın.

SQO polıtsııa departamenti qazirgi ýaqytta osy faktige qatysty tergep-tekserý is-sharalaryn júrgizip jatyr. 

Buǵan deıin SQO-daǵy úıirli shegirtkege qatysty jaǵdaıdy jazǵan edik.