SQO-da topıarııa músinderin jasaıtyn tseh jumys isteıdi
PETROPAVL. QazAqparat – Soltústik Qazaqstan oblysynda aýyl kásipkerleri topıarııa músinderin jasaıtyn tseh ashyp, jańa kásipti damytyp jatyr, dep habarlaıdy QazAqparat tilshisi.
Qyzyljar aýdany Beskól aýylynyń turǵyndary Dınara Júsipova jáne Elena Levına adam boıynan asatyn alyp músinder jasaýdy qolǵa aldy. Topıarııa dep atalatyn bul óner týyndysy saıabaqtarǵa, baqtarǵa, kóshelerge, demalys oryndaryna kórik beredi. Balabaqshalar men jeke turǵyn úılerdi bezendirýge de qoldanýǵa bolady eken. Qurbylar úshin bul – bastapqyda hobbı bolsa, qazir tabys kózine aınalǵan.
«Alǵashynda ózimiz úshin istedik. Keıin dostarymyzǵa syılaı bastadyq. Osylaısha bara-bara sheberligimizdi jetildirip, óz isimizdi ashýǵa uıǵardyq. Qazir jeke kásipkerligimiz bar. Úı janynan tseh ashyp, sol jerde eńbek etip jatyrmyz. Bul iste bizge kúıeýlerimiz, balalarymyz, týystarymyz kómektesedi. Jaqynda eki jumysshyny aldyq», - deıdi Elena Levına.
Sheberler topıarıı músinder jasaýda penoplast, jasandy gazondy, áınek plastıgi men boıaýlardy qoldanady. Penoplastan músindi shyǵarsa, áınek plastıkpen oǵan beriktik beredi. Al jasandy shóppen qaptap, bezendiredi. Músinder eshqandaı qondyrǵysyz bastan-aıaq qolmen jasalady.
«Eń alǵash aıýdyń músinin jasadyq. Keıin dınozavr paıda boldy. Kompozıtsııany ózimiz oılap tabamyz. Biz jasaǵan aıýlar men dınozavrlar qazir Petropavldaǵy demalys ornyna kórik berip tur. Elikterdi, pildi jáne aıýdy qonjyǵymen astanadaǵy balabaqshalardyń biri satyp alyp ketti. Tapsyrys túsip jatyr. Bizdiń músinderiń ereksheligi – qandaı vandalǵa bolsyn tótep beredi. Áınekplastıkti qoldanýdyń nátıjesinde elý jylǵa deıin turady», - deıdi Dınara Júsipova.
Dınaranyń negizgi mamandyǵy – býhgalter. Elena bolsa, zańger, menedjer. Qurbylar bala kezden ónerge jaqyn, bir-birin búginde aıtqyzbastan túsinedi.
«Men de, Dınara da ónerge jaqynbyz. Dınara túrli monshaqtar men bıserden ádemi buıymdar jasaıdy. Meniń ákem kásibı sýretshi bolǵan. Kishkentaıymnan qolyma molbert pen qylqalam ustap óstim. Bısermen túrli buıymdar jasaımyn. Gıpspen, tsementpen jumys isteımin. Sol sebepti ónerdiń jańa túrin meńgerý bizge qıyndyq týdyrǵan joq», - deıdi Elena.
Qurbylar munymen toqtap qalmaq emes. Aıtýlarynsha, penoplastyń qurylys materıaly retinde múmkindigi joǵary. Endi olar osy materıaldy qoldana otyra úı salyp shyqpaq.
