SQO-da toqtaýsyz jaýynnan egin oraǵy kesheýildep jatyr

PETROPAVL. QazAqparat – Soltústik Qazaqstan oblysynda jaýyn-shashynnyń saldarynan egin oraǵy shamamen bir aptaǵa kesheýildep jatyr. Ázirge dándi jáne dándi-burshaqty daqyldardyń tek 27% jınaldy, dep habarlaıdy QazAqparat tilshisi.

SQO Aýyl sharýashylyǵy jáne jer qatynastary basqamasynyń málimetinshe, tamyz aıynda 51,9 mm mólsherinde jaýyn jaýǵan. Bul ádettegi normadan 108% artyq. Joǵary ylǵaldylyq pisken astyqty jınap alýdy qıyndatty. Saldarynan 30 tamyzdan bastap 6 qyrkúıekke deıin egin oraǵy ýaqytsha toqtatyldy.

Jaýyn-shashyn basylyp, aýa raıy turaqtanǵannan keıin óńir dıqandary naýqanǵa qaıta kiristi.

Qazirgi ýaqytta SQO-da 919,1 myń ga dándi jáne dándi-burshaqty alqaptyń astyǵy bastyryldy. Bul – barlyq aýmaqtyń 27%.

Kúzgi dala jumystaryna 13 myń tehnıka jumyldyrylǵan. Egin oraǵyna 58,9 myń tonna arzandatylǵan dızel otyny bólindi.

Óńirde 317 astyq keptirgish bar, olardyń ónimdiligi saǵatyna – 9,7 myń tonna. Búginde barlyǵy iske qosylǵan. Jaýyn-shashynǵa baılanysty qazirgi ýaqytta Aýyl sharýashylyǵy mınıstrliginde óńirlerge arzan baǵamen qosymsha dızel otynyn bólý máselesi qarastyrylyp jatyr. Janar-jaǵarmaı bıdaıdy keptirýge paıdalanylmaq.

Al «Qazgıdromet» RMK málimetinshe, SQO-da 11-12 qyrkúıek kúnderi taǵy da jaýyn jaýmaq.