SQO-da toǵyz kól on jylǵa jalǵa berilmek
PETROPAVL. KAZINFORM — Soltústik Qazaqstan oblysynda kásipkerler balyq sharýashylyǵymen aınalysý úshin kóldi jalǵa ala alady.
Tańdaý da bar. Konkýrsqa óńirdegi 9 sý aıdyny shyǵaryldy.
Konkýrsty QR Aýyl sharýashylyǵy mınıstrligi Balyq sharýashylyǵy komıtetiniń Esil oblysaralyq basseındik balyq sharýashylyǵy ınspektsııasy ótkizedi. Ótinimder 28 tamyzda saǵat 09:55–te qabyldanýyn toqtatady.
Konkýrsqa usynylǵan sý aıdyndarynyń jalpy aýmaǵy 595 ga shamasynda.
Atap aıtqanda, Aqqaıyń aýdanyndaǵy Úlken Toqshyn kóliniń aýmaǵy — 62,5 ga. Esil aýdanynda Mýsın jáne Úlken Qostomar kólderi bar. Olardyń aýmaǵy tıisinshe 80,4 jáne 92 ga.
Jambyl aýdanyndaǵy Sýatkóldiń aýmaǵy — 48 ga. Qyzyljar aýdanynan birden úsh kól usynylyp otyr. Olar: aýmaǵy 30,3 ga bolatyn Stadnoe, 74 ga alyp jatqan Chırok jáne 114,92 ga sozylǵan Hýdıkovoe kólderi. Mamlıýt aýdanyndaǵy Krasnoznamen kóliniń aýmaǵy — 42 ga. Al Chıvılov kóli 51 ga alyp jatyr.
Barlyq 9 kól kól-taýarlyq sharýashylyq qyzmetin júrgizý úshin 10 jyl merzimge beriledi.
Mamandardyń aıtýynsha, konkýrsqa qatysý úshin jeke jáne zańdy tulǵalar aldymen e-qazyna.kz veb-portalynda tirkelýi qajet. Úmitkerler elektrondyq tsıfrlyq qoltańba arqyly belgilengen nysanǵa ótinim beredi. Qatysý úshin 100 AEK mólsherinde kepildik jarna tóleý qajet.
Kól-taýarlyq sharýashylyq — sý aıdynynda balyq ósirý, onyń ónimdiligin arttyrý jáne balyq ónimin óndirýge baǵyttalǵan kásipkerlik qyzmettiń bir túri. Konkýrs nátıjesinde sý aıdyndary bekitilgen kásipkerler olardy belgilengen talaptarǵa sáıkes paıdalanýǵa tıis.
Buǵan deıin eldegi ózen-kólderdi qorǵaýǵa arnalǵan segiz jospar daıyndalyp jatqanyn jazǵan edik.
