SQO-da tergeý ızolıatoryna ekskýrsııa uıymdastyryldy

PETROPAVL. QazAqparat – Soltústik Qazaqstan oblysynda Sybaılas jemqorlyqqa qarsy qyzmet jergilikti basqarýshy organdardyń jetekshilerine tergeý ızolıatoryna saıahat uıymdastyrdy, dep habarlaıdy QazAqparat tilshisi.

SQO Sybaılas jemqorlyqqa qarsy qyzmet mamandarynyń málimetinshe, búginde para alyp ustalǵan sheneýnikter laýazymyna, atqaratyn qyzmetine qaramastan zań aldynda jaýap beredi.

«Búgin biz jergilikti atqarýshy organdardyń jetekshilerine sybaılas jemqorlyqqa barý, para alýdyń nemen aıaqtalatynyn is júzinde kórsetýdi maqsat ettik. Oblys ákiminiń bastamasymen tergeý ızolıatoryna ekskýrsııa uıymdastyrdyq. «Eskertý» saıahaty barysynda tergelip jatqan burynǵy áriptesterin kórip ketedi», - deıdi QR Sybaılas jemqorlyqqa qarsy is-qımyl Agenttiginiń SQO boıynsha jetekshisi Ernar Baıanǵazın.

Vedomstvo aldyn alý jumystaryn jıi ótkizip turady. Preventıvtik tásilderdiń biri – sybaılas jemqorlyqqa jol bergen ákimdiktiń laýazymdy qyzmetshilerine qatysty sot otyrystarynyń barysyn memlekettik qurylymdardyń jetekshilerine jetkizip otyrý.

«Eshkim jyly, ári jaıly tósegin búgin ózderińiz kórgen kerýetke aıyrbastyǵysy kelmeıdi. Bostandyqtan aıyrý mekemelerindegi jaǵdaıdy ózderińiz kórińizder. Ata-ana, balalar týraly da oılaý qajet», - dep qorytyndylady óz sózin Ernar Baıanǵazın.

Búgin SQO-daǵy memlekettik sáýlet-qurylys baqylaýy mekemesi basshylyǵynyń sybaılas jemqorlyq boıynsha kúdikke ilingendigin aıtqan edik. Mekeme basshysy men bólim basshysyna «júıeli túrde para aldy» degen aıyp taǵyldy.